Британиянинг Thomas Cook туроператори 178 йиллик фаолиятидан сўнг ёпилишини эълон қилди. Бундан 600 минг сайёҳ жабр кўрди

Британиянинг Thomas Cook туристик компанияси бугун, 23 сентябрь куни мажбурий равишда тугатилганлигини эълон қилди. Бу ҳақда Meduza хабар берди.

«Бугун миллионлаб сайёҳларнинг бутун дунё бўйлаб кезишига ва мароқли ҳордиқ чиқаришига улкан ҳисса қўшиб келган компаниямиз учун жуда қайғули кун», — дейди Thomas Cook ижрочи директори Питер Фанкхаузер.

Компаниянинг тугатилиши бутун дунёда 600 минг нафар туристнинг, жумладан 150 минг нафар Буюк Британия фуқароларининг моддий зарар кўришига олиб келди, деб ёзади Associated Press.

Thomas Cook’нинг тўртта авиакомпанияси парвозларни тўхтатган, 16 мамлакатдаги 21 минг ходим ишдан бўшатилган.

Буюк Британия ҳукумати дам олиш кунлари 23 сентябрдан 6 октябргача бўлган сайёҳлар ўз мамлакатига қайтиш харажатларини тўлаб беради. Улар учун ўнлаб чартер рейслари буюртма қилинган, биринчи бўш самолётлар Британия аэропортларидан 22 сентябрь оқшомида турли нуқталарга учиб кетган. CNN’нинг ёзишича, бу тинчлик даврида Буюк Британия томонидан фуқароларни мамлакатга қайтариш учун қилинаётган энг қиммат операция. Унинг қиймати 125 миллиондан 750 миллион АҚШ долларигача баҳоланмоқда.

Thomas Cook компанияси молиявий аҳволининг ночор ҳолати ҳақида 20 сентябрда огоҳлантирган ва инқироздан чиқиши учун 250 миллион АҚШ доллари бера оладиган инвестор излаганди.