Тошкентда «Автомобильсиз кун» тадбири бўлиб ўтмоқда

Бугун, 22 сентябрь куни Тошкентда Европа мобил (ҳаракатланиш) ҳафталиги доирасида илк бор Автомобильсиз кун тадбири ўтказилмоқда.

Учтепа туманида соат 9:00 дан 23:00 гача Лутфий (Фарҳод кўчасидан Ширин кўчасига қадар) ва Ширин (Лутфий кўчасидан Катта Хирмонтепа кўчасига қадар) кўчаларининг бир қисми шахсий автотранспорт воситалари учун (автобуслар учун эмас) ёпилган (харита).

Аҳоли «Биз билан юр!» шиори остида пиёда сайр қилишга тарғиб қилувчи акция, велосайр ва кўнгилочар тадбирларга таклиф этилмоқда. Жумладан, тадбир давомида:

• профессионал велосипедчиларнинг чиқишлари ва улар ўртасида мусобақалар;
• велосипедларни таъмирлаш бўйича маҳорат машғулотлари;
• роллер, кўча машшоқлари ва кўзбойлоғичларнинг чиқишлари;
• асфалтга расм чизиш танлови;
• рақс флешмоблари;
• аниматорларнинг томошалари

Автомобильсиз кун тадбири «Сеул» паркида соат 18:00 дан 20:00 гача бўлиб ўтадиган байрамона концерт билан якунланади.

«Gazeta.uz»нинг ёзишича, Европа мобил ҳафталиги бу йил 18-бор ўтказилмоқда, унда жаҳоннинг 50 мамлакатидаги салкам 3000 та шаҳар қатнашмоқда. Ҳафталик доирасидаги тадбирлар аҳоли ўртасида соғлом турмуш тарзини тарғиб қилиш ва ҳаракатланишнинг турли усулларини оммалаштириш орқали ҳаёт сифатини яхшилашга қаратилган.

Тошкентда 19 сентябрь куни Бепул метро куни ташкил этилган эди. Шу куни аҳоли метрополитен хизматидан бепул фойдаланиши мумкин бўлди, бекатларда эса концертлар, санъаткорларнинг чиқишлари ва кўргазмалар ташкил этилди.