Тошкент вилояти маъмурий маркази — Нурафшон шаҳрида Президент администрацияси раҳбари Зайнилобиддин Низомиддинов раислигида йиғилиш бўлиб ўтди. Тошкент вилояти ҳокимлиги ахборот хизмати хабарига кўра, вазирлик, қўмита ва идора раҳбарлари, тадбиркорлар иштирок этган йиғилишда Президентнинг Тошкент вилоятига ташрифи давомида берилган топшириқлар ижросининг бориши атрофлича, танқидий-таҳлилий муҳокама қилинган.
Шунингдек, йиғилишда вилоятда қўшимча аниқланган ва кечиктириб бўлмайдиган муаммоли масалалар ва уларни ҳал этиш, ҳудудни ижтимоий-иқтисодий ривожлантириш бўйича 2019 йил якунига қадар амалга ошириладиган ишлар кўриб чиқилган.
Зайнилобиддин Низомиддинов фаолиятини амалга оширишда муаммоли ҳолатга дуч келган тадбиркорлар билан мулоқот қилган. Уларни қийнаётган масалалар туман ва шаҳарлардаги сектор раҳбарлари, тегишли соҳа мутасаддилари иштирокида атрофлича кўриб чиқилиб, жойида ижобий ҳал этилган.
«Йиғилишда кун тартибидаги масалалар бўйича мутасадди раҳбарларнинг ҳисоботи эшитилди», — дейилади вилоят ҳокимлиги ахборот хизмати хабарида.
Изоҳ (0)