ОАВда «Сўконғич тарбиячи» сарлавҳали хабар чоп этилди. Унда келтирилган аудиоёзувдаги овозларнинг бири Қашқадарё вилоятининг бош тарбиячиси Асрор Алимардоновга тегишли эканлиги айтилади.
Аудиоёзувда бошлиқ суҳбатдош ходимига ахборот олишга келган журналист билан гаплашмасликни айтиб, уни ҳайдаб юбориш ҳақида топшириқ беради. Бошқарма бошлиғининг овози эканлиги тахмин қилинаётган ёзувда у ходимига журналистга ахборот беришни тақиқлаш баробарида боғчаларга киритмаслигини, мухбирнинг таъмагирлиги бўлса, исбот учун аудиоёзув ёзиш имкони ҳақида сўрайди.
«Дарё» мухбири вазиятга ойдинлик киритиш мақсадида Қашқадарё вилояти мактабгача таълим бошқармаси бошлиғи Асрор Алимардонов билан суҳбатлашди. Бошқарма бошлиғи журналистни боғчага киритмаслиги ва ҳайдаб юбориш ҳақида топшириқ беришининг сабабини очиқлади. Унинг айтишича, Қамашидаги боғчаларга борган журналист яқинда Жиззах вилоятидаги шифохоналардан бирининг вирусология бўлимида даволаниб чиққан. Шунинг учун ҳам у журналист соғлиғига шубҳа қилиб, болалар олдига қўймаган.
Вилоят мактабгача таълим бошқармаси бошлиғи Асрор Алимардоновнинг тан олишича, аудиоёзувдаги овоз ҳақиқатан ҳам унинг овози, суҳбатдоши эса Қамаши тумани мактабгача таълим бўлими мудирлигини вақтинча бажарувчи Жавоҳир Хўжамбердиев.
— Ходимимга ҳақиқатан ҳам Камола исмли журналистга ахборот бермасликни тайинладим. Ўша журналист яна вилоятга келадиган бўлса, яна киритмаслик хусусида топшириқ бераман, — дейди бошқарма бошлиғи Асрор Алимардонов. — Боиси Камола Шерматова исмли журналист яқинда менга СМС ёзиб, у билан келишиб ишлашимни, гаплашиб олиш учун у даволанаётган Жиззахдаги шифохоналардан бирининг вирусология бўлимига боришимни айтди. Камола Шерматова аввал ҳам вилоятимизга келган ва журналистга хос бўлмаган хатти-ҳаракатлари билан бизни ҳайратлантирган. Қарши шаҳридаги «Эркатой» боғчасида бўлиб, болалар кўз ўнгида тамаки чеккан. Косон туманидаги боғча мудираларини қўрқитиб, пул талаб қилган. Кўпчилик мудиралардан пул ҳам олган. Бунга етарли даражада исботим бор, албатта. Агар мутасадди ташкилотлар қизиқса, тақдим этишим мумкин.
Асрор Алимардонов иқрорларига кўра, ўзини мухбир сифатида таништираётган Камола Шерматова доимий равишда уни ҳақорат қилиб келган, шаънини таҳқирловчи СМС хабарлар ёзиб, у билан келишиши лозимлигини, йўқса унга қарши ишлашда давом этишини билдирган.
— Менга бошқа вилоят мактабгача таълим бошқармаси бошлиғини мисол қилиб келтириб, у билан келишиб ишлаётганини, шунинг учун ҳам ҳар бир ишда унга кўмаклашаётганлигини, қолаверса, вилоятимиздаги ҳокимлардан бири билан ҳам кўп йиллик қадрдон эканлигини ёзиб, улар каби келишишимни сўрайди. Ҳар доим кўришиб гаплашишни, айтган манзилига боришим лозимлигини ёзади. Яқинда ҳам Жиззахдаги шифохонада даволанаётганлигини ёзиб, ўша ерга боришимни сўради.
Алимардонов сўзининг исботи сифатида тақдим этган СМС хабарномалар скриншотидан маълум бўлишича, 15-02 рақамли телефон эгасидан келган хабарда «Жиззахда вирусологиядаман, шўтга келинг» деган хабар бор.
15 02 рақами Камола Шерматовага тегишлими ёки йўқми, буни текшириб кўриш мақсадида журналист билан боғландик ва ушбу СМС хабарларни у жўнатган-жўнатмагани билан ҳам қизиқдик.
«Дарё» мухбири билан айнан шу рақам орқали мулоқотга киришган Камола Шерматова даставвал мухбирдан бу муаммони ўрганиш учун расмий хат сўради. Мухбир шу рақамдан бошқарма бошлиғига юборилган «СМС хабарномаларни Сиз ёзганмисиз ёки йўқми, шунга ойдинлик киритмоқчиман» дегач, Шерматова ҳақиқатан ҳам бошқарма бошлиғига хабарномалар юборганини, аммо ҳақорат қилмаганини айтди. Журналист Шерматованинг айтишича, бошқарма бошлиғи унга мунтазам равишда пул таклиф қилиб келган.
Камола Шерматова томонидан тақдим этилган СМС хабарномалар скриншотида Асрор Алимардонов ҳақиқатан ҳам Шерматовани Қаршига таклиф қилган.
Бошқарма бошлиғи Асрор Алимардонов «Дарё» мухбири билан суҳбати давомида Камола Шерматова бошқарма таркибидаги мактабгача таълим ташкилотларига келадиган бўлса, яна шундай топшириқ беришини айтмоқда.
«Дарё» мухбири бошқарма масъуллари билан суҳбати давомида «Bong.uz» журналисти кўтарган маргаринлар масаласига ҳам тўхталиб ўтди.
Бошқармада соғлом овқатланишни ташкил этиш бўлими бошлиғи сифатида ишлаб келаётган Земфира Қурбонованинг таъкидлашича, ҳақиқатан ҳам боғча болаларига табиий, сигир сутидан тайёрланган сариёғ берилиши керак.
Қамаши тумани мактабгача таълим бўлими бошлиғи вазифасини бажариб келаётган Жавоҳир Хўжамбердиев имзоси билан бошқарма бошлиғига жорий йилнинг 23 август куни тақдим этилган маълумотномада келтирилишича, тумандаги боғчаларга берилаётган маҳсулот маргарин эмас, сариёғ эканлиги айтилиб, таркибида ўсимлик ёғи борлиги, туман давлат санитария-эпидемиология назорат маркази томонидан истеъмолга яроқли эканлиги ҳақида маълумот берилгани ёзилади.
Жавоҳир Хўжамбердиевнинг бошқармага маълум қилишича, 2019- йилнинг июль ойида тумандаги МТТларда тарбияланаётган болаларнинг соғлом овқатланишини таъминлаш мақсадида бўлим «Тура Уралович инвест» МЧЖ билан №1-сонли 14 миллион 801 минг сўмлик шартнома имзоланган. Шартномага асосан, 41 000 сўмдан 361 кило сариёғ маҳсулоти етказиб берилган. Унга кўра, олдиндан шартнома тузиш учун асос бўладиган бирламчи ҳужжатлар, яъни тижорат таклифи, гувоҳнома, мувофиқлик сертификатлари тақдим этилган. Ундан ташқари, Youth Empire МЧЖ билан ҳам №12/19-сонли 6 миллион 560 минг сўмлик шартнома имзоланган. Шартномага асосан, 41 минг сўмдан 160 кило сариёғ етказиб берилган. Мазкур ташкилотдан ҳам шартнома тузиш учун асос бўладиган бирламчи ҳужжатлар — тижорат таклифи, гувоҳнома, мувофиқлик сертификатлари тақдим этилган.
Қамаши тумани мактабгача таълим бўлими бошлиғи вазифасини бажарувчи Жавоҳир Хўжамбердиевнинг ёзишича, ҳаммаси қонуний ва рисоладагидек.
Аммо бошқарманинг соғлом овқатланишни ташкил этиш бўлими бошлиғи Земфира Қурбонова бошқача фикрда. Земфира Қурбоновага кўра, ҳар ойнинг бошида вилоят ҳокими ўринбосари боғча болаларига берилиши лозим бўлган маҳсулотлар ва уларнинг нархларини тасдиқлайди. Мазкур тасдиққа мувофиқ боғча болаларига табиий, сигир сутидан тайёрланган 82,5 фоизли сариёғ берилиши керак. Ва ўша сариёғ нархи 41 минг сўм қилиб тасдиқланган.
Қамашидаги боғча болаларига берилган таркибида ўсимлик ёғи бўлган сариёғ тасдиқланган рўйхатда 30 минг сўм қилиб белгиланган.
Бошқарма мутасаддиларининг айтишича, мазкур ҳолатда шартнома тузишда нарх борасида ғирром қилинган.
Бошқарма бош ҳисобчиси Шокир Эроловнинг тушунтиришича, боғчага маҳсулот бўлим таркибида тузилган 5 ёки 7 кишидан иборат танлов ҳайъати хулосасига кўра олиб кирилади. Тумандаги боғчаларга маҳсулот олиб кириш масаласига мактабгача таълим бошқармаси масъуллари умуман аралашмайди. Тадбиркор ўз маҳсулотини тавсия қилгач, танлов ҳайъати буни ўрганиб чиқади. Танлов ҳайъатига тақдим этилган тижорат таклифи, гувоҳнома, мувофиқлик сертификатлари шартнома тузишга асос бўлади.
Тартиб-тамойилга кўра танлов комиссиясига бўлим мудири раислик қилиши керак экан. Аммо Қамашида бу тартиб бузилган. «Тура Уралович инвест» МЧЖ маҳсулотларини кўриб чиқувчи танлов комиссиясида Ж.Маҳмадалиев раислиги кўрсатилади.
Бошқарама масъуллари бу ҳолатни Ж. Маҳмадалиев ўша пайтда бўлимда вақтинча мудир вазифасини бажарганлиги билан изоҳлашмоқда.
Бошқарма бошлиғи ўринбосари Феруз Жабборовнинг маълумот беришича, МТТ раҳбари ва ҳамшираси маҳсулот талабга жавоб бермаса, бу ҳақда бўлимга эътироз билдиришга, маҳсулотни олишни рад этишга ҳақли. Қолаверса, бўлим ҳар ой боғча раҳбарияти буюртмасига кўра, маҳсулот буюртиради.
— Қамаши туманидаги боғча масъулларидан шу пайтга қадар бирор марта ҳам маҳсулот талабга жавоб бермаслиги ёки буюртма қилинган маҳсулот берилмаётгани ҳақида эътироз келиб тушмаган, — дейди Земфира Қурбонова. — Агар боғчаларда шундай ҳолат бўлганда, биз хабар топардик.
Бироқ Қамаши туманидаги 1-сонли мактабгача таълим ташкилоти раҳбари ушбу масала юзасидан нафақат бўлим, бошқармага ҳам такрор-такрор маълум қилганлигини айтмоқда.
Мазкур ҳолатда бошқарма масъуллари ўзларини оқлашга уриниши тайин, албатта. Аммо тартиб-тамойил улар айтгандек бўлиши ҳам мумкин. Бироқ ҳар қандай ҳолатда ҳам бошқарма бошлиғининг ўз ходимига журналистга ахборот бермаслиги ҳақида топшириқ бериши, ҳайдашга ва таъмагирлик қилишга чорлаб, овозини ёзиб олишга ундашини оқлаб бўлмайди. Демак, бу ҳолатга фақат масъуллар аниқлик киритиши мумкин.
Изоҳ (0)