Тошкент вилоятининг Паркент туманидаги Ўзбекистон Фанлар академиясига қарашли Физика-Қуёш институти бузилиши ва кўчирилиши режалаштирилмаган. Бу ҳақда «Gazeta.uz» хабар бермоқда.
Бу ҳақда 20 сентябрь, жума куни қатор оммавий ахборот воситалари нотўғри хабар тарқатганди.
Бунга Норматив-ҳуқуқий ҳужжатлар муҳокамаси порталида жойлаштирилган ҳукумат фармойиши талқини сабаб бўлди. Ушбу ҳужжатга кўра Тошкент вилоятининг Қибрай тумани Чирчиқ дарёсининг чап қирғоғи, «Ҳўкизорол» норуда маҳсулотлари кони ҳудудидаги Халқаро қуёш энергияси институтининг тажриба лабораториясига ажратилган 50 гектар ер майдони ўрнига, лаборатория талабларини қондирадиган бошқа ер майдони ажратиш, кон ҳудудининг 2 гектар қисмида жойлашган лаборатория бино ва иншоотларини янги таклиф этилаётган ҳудудга кўчириб ўтказиш белгиланган.
Бундан кўзда тутилган мақсад Қибрай ва Юқоричирчиқ туманлари ҳудудидан ўтувчи узунлиги 19,2 километр ва Қибрай тумани ҳудудидан ўтувчи узунлиги 15 километр бўлган умумий фойдаланишдаги автомобиль йўлини қуриш ҳамда Тошкент халқаро аэропорти 4-терминали қурилишини жадаллаштириш, келгусида Тошкент вилояти ва Тошкент шаҳрида олиб бориладиган йўл-қурилиш ишларига норуда маҳсулотларни етказиб бериш эканлиги қайд этилган.
Тошкент вилояти ҳокимлигига Халқаро қуёш энергияси институтининг тажриба полигонига бино-иншоотларини кўчириб ўтказилиши учун Қибрай тумани ҳудудидан 2 гектар ер майдони ажратиб берилишини таъминлаш топширилган.
Геология ва минерал ресурслар, Экология ва атроф-муҳитни муҳофаза қилиш ва Автомобиль йўллари қўмиталарига кўрсатилган ҳудуддаги норуда маҳсулотлар заҳирасини ва қазиб олиш ишларининг атроф-муҳитга таъсирини аниқлаш ҳамда Ўзбекистон—Германия «Papenburg Uzbekistan» қўшма корхонасига тегишли лойиҳа ва лицензия ҳужжатларини икки ой муддатда расмийлаштириш вазифаси юклатилган.
Изоҳ (0)