Жиноят ишлари бўйича Касби туман судида миришкорлик 29 ёшли аёл Ш.Р.ни ўзини-ўзи ўлдириш даражасига етказишда айбланаётган Ш.Г. ҳамда С.Т.нинг иши кўриб чиқилмоқда. Бу ҳақда суд мажлисида қатнашган «Дарё» мухбири хабар бермоқда.
«Дарё»да аввалроқ миришкорлик жувоннинг ўзи ишлайдиган гўзаллик салонида 3 апрель куни осилган ҳолда топилгани ва унинг яқинлари қизини ўзини-ўзи ўлдириш даражасига олиб келишгани ҳақида сўз борган мақола чоп этилганди. Мақолада марҳуманинг отаси Зокир Каримов қизи ўлдирилган бўлиши мумкинлигини ҳам тахмин қилганди.
19 сентябрь куни судда қатнашган «Дарё» мухбири Отабек Қўлдошевнинг ёзишича, суд иккинчи мажлисида 8 нафар гувоҳ кўрсатмаларини тинглаган. Аммо гувоҳларнинг аксарияти терговга қадар суриштирув давомида айтган кўрсатмаларидан тонган.
Аниқланишича, дастлабки суд мажлиси 12 сентябрь куни бўлиб ўтган. Унда жабрланувчилар марҳума Ш.Р.нинг ота-онаси Маҳфуза Жўраева ҳамда Зокир Каримовларнинг сўзи тингланган.
— Дастлабки суд мажлисида манфатини ҳимоя қилаётганим Маҳфуза Жўраева ҳамда Зокир Каримовларнинг қизи, марҳума Ш.Р. билан кўришиб юрган ва 1 апрель кунги воқеаларга сабабчи бўлган собиқ ИИБ ходими Зафар Аминов ҳам иштирок этди, — дейди адвокат Нодиржон Мўминов. – Зафар Аминов биринчи суд мажлисида ҳам жабрланувчи, ҳам жавобгар сифатида намоён бўлди. Иккинчи суд мажлисида эса йўқ.
Адвокат Нодиржон Мўминовнинг айтишича, марҳума Ш.Р. иштирокидаги воқеаларнинг асосий қаҳрамонларидан бири собиқ ИИБ ходими Зафар Аминов дастлабки суд мажлисига ҳам ИИБ ходимлари ёрдамида келтирилган.
Изоҳ (0)