Ижтимоий тармоқларда Андижон вилояти Избоскан туманидаги мактабларнинг бирида учинчи қаватдаги деразадан ўқувчи қиз тушиб кетганлиги ҳақида хабарлар тарқалди.
Вилоят халқ таълими бошқармасидан «Дарё»га маълум қилишларича, ҳодиса 19 сентябрь куни соат тахминан 10:30 да Избоскан туманидаги 39-ихтисослаштирилган мактаб-интернатининг 11-«А» синф ўқувчиси Ғаниева Исмигул учинчи соат информатика фани дарс машғулоти тугаб, танаффус вақтида мактаб биносининг учинчи қаватидаги зинапоя ёнидаги деразада ўтирган ҳолатида эҳтиётсизлиги оқибатида боши айланиб, бахтсиз ҳодиса сабабли тушиб кетган.
Ҳодиса юз берган вақтнинг ўзидаёқ ўқувчи мактабнинг масъул ходимлари томонидан Избоскан туманидаги шошилинч тез тиббий ёрдам бўлимига олиб борилган ва биринчи ёрдам кўрсатилган. Ушбу ҳолат юзасидан туман прокуратураси ва ички ишлар бўлими томонидан суриштирув ишлари олиб борилмоқда.
Ўқувчи билан ўтказилган суҳбат жараёнида унинг берган оғзаки кўрсатмасига кўра, ҳодиса юз берган вақтда унинг атрофида ҳеч ким бўлмаган ҳамда унга нисбатан бошқа шахс томонидан қасд қилинмаган, ўзининг ҳам жонига қасд қилиш мақсади бўлмаган. «У боши айланиб эҳтиётсизлиги оқибатида тушиб кетганлигини, ҳозирда саломатлиги яхши эканлигини билдирган», — дейилади Халқ таълими бошқармаси ахборотида.
Мазкур ҳолат юзасидан қизнинг ота-онаси билан ўтказилган суҳбат натижасида улар томонидан муассаса масъул ходимларига нисбатан ҳеч қандай эътирозлари йўқлиги, ҳақиқатан ҳам фарзанди Исмигул Ғаниева бахтсиз ҳодиса сабабли учинчи қаватдан тушиб кетганлигини, фарзанди муолажа олаётган тиббиёт муассасасида доимий назоратда эканлигини билдирган.
«Дарё» мухбири айни пайтда ҳолатни ўрганиш мақсадида Избоскан туманида бўлиб турибди.
Изоҳ (0)