Jinoyat ishlari bo‘yicha Kasbi tuman sudida mirishkorlik 29 yoshli ayol Sh.R.ni o‘zini-o‘zi o‘ldirish darajasiga yetkazishda ayblanayotgan Sh.G. hamda S.T.ning ishi ko‘rib chiqilmoqda. Bu haqda sud majlisida qatnashgan “Daryo” muxbiri xabar bermoqda.
“Daryo”da avvalroq mirishkorlik juvonning o‘zi ishlaydigan go‘zallik salonida 3-aprel kuni osilgan holda topilgani va uning yaqinlari qizini o‘zini-o‘zi o‘ldirish darajasiga olib kelishgani haqida so‘z borgan maqola chop etilgandi. Maqolada marhumaning otasi Zokir Karimov qizi o‘ldirilgan bo‘lishi mumkinligini ham taxmin qilgandi.
19-sentabr kuni sudda qatnashgan “Daryo” muxbiri Otabek Qo‘ldoshevning yozishicha, sud ikkinchi majlisida 8 nafar guvoh ko‘rsatmalarini tinglagan. Ammo guvohlarning aksariyati tergovga qadar surishtiruv davomida aytgan ko‘rsatmalaridan tongan.
Aniqlanishicha, dastlabki sud majlisi 12-sentabr kuni bo‘lib o‘tgan. Unda jabrlanuvchilar marhuma Sh.R.ning ota-onasi Mahfuza Jo‘rayeva hamda Zokir Karimovlarning so‘zi tinglangan.
— Dastlabki sud majlisida manfatini himoya qilayotganim Mahfuza Jo‘rayeva hamda Zokir Karimovlarning qizi, marhuma Sh.R. bilan ko‘rishib yurgan va 1-aprel kungi voqealarga sababchi bo‘lgan sobiq IIB xodimi Zafar Aminov ham ishtirok etdi, — deydi advokat Nodirjon Mo‘minov. – Zafar Aminov birinchi sud majlisida ham jabrlanuvchi, ham javobgar sifatida namoyon bo‘ldi. Ikkinchi sud majlisida esa yo‘q.
Advokat Nodirjon Mo‘minovning aytishicha, marhuma Sh.R. ishtirokidagi voqealarning asosiy qahramonlaridan biri sobiq IIB xodimi Zafar Aminov dastlabki sud majlisiga ham IIB xodimlari yordamida keltirilgan.
Izoh (0)