16 сентябрь, душанба куни Тошкент шаҳар Яккасарой тумани ИИО ФМБга жамоавий ариза келиб тушди, деб хабар беради Тошкент шаҳар ИИББ матбуот хизмати.
Жами 52 кишидан ташкил топган ва республиканинг турли ҳудудларида истиқомат қилувчи аризачиларнинг маълум қилишича, улар Бандлик ва меҳнат муносабатлари вазирлиги томонидан 2018 йил ноябрь ойида тақдим этилган тегишли лицензияга эга бўлган Human бандлик агентлиги МЧЖ билан 2018 йилнинг ноябрь ойидан 2019 йилнинг сентябрь ойигача шартномалар тузган.
Шартномаларга кўра, МЧЖ уларни Европа давлатларида, хусусан, Германия, Чехия, Япония, Туркия, Болгария ва Литвада ишга жойлаштириш мажбуриятини ўз зиммасига олган. Бунинг учун ҳар бир аризачи МЧЖнинг ҳисоб рақамига 18 дан 35 миллион сўмгача бўлган миқдордаги маблағни кўчирган. Шу тарзда Human бандлик агентлиги МЧЖнинг ҳисоб рақамига 52 нафар аризачидан умумий миқдорда 1 670 500 000 сўм келиб тушган.
Бироқ аризачилардан ҳеч бири чет элда ишга жойлаштирилмади.
МЧЖ жабрланувчиларга пулларни қайтариб бермаганлиги ҳақида Ўзбекистон Республикаси Бандлик ва меҳнат муносабатлари вазирлиги ўзининг расмий сайтида хабар берган эди.
Терговолди ҳаракатлари Яккасарой тумани ИИО ФМБ ва прокуратураси томонидан ҳамкорликда олиб борилди.
Натижада Тошкент шаҳар прокуратураси томонидан Ўзбекистон Республикаси Жиноят кодексининг 168-моддаси, 4-қисми «а» банди (Фирибгарлик, жуда кўп миқдорда) бўйича жиноий иш қўзғатилди.
Ҳозирги вақтда айбланувчи сифатида ушбу МЧЖ директори 29 ёшли Шоҳнур Ф. жалб қилинди.
Юқоридаги аризачилардан ташқари, айни дамда республиканинг бошқа вилоятларидан ҳам аризачилар мурожаат қилмоқда.
«Агарда сиз ҳам ушбу агентлик ҳаракатларидан жабр кўрган бўлсангиз ёки ушбу иш бўйича маълумотга эга бўлсангиз, 71-230-98-40 рақами орқали мурожаат қилинг», — дейилади хабарда.
Изоҳ (0)