«Тақирбошлар» (Skinhead) жуфтлиги 17 сентябрь куни оқшомда Санкт-Петербург шаҳрининг Красногвардейский туманида ўзбек муҳожирига ҳужум қилди. Бу ҳақда «78.ru» хабар берди.
Воқеа соат 23:30 ларда Среднеохтин кўчасидаги 16/27-уйлар атрофида рўй берган. Тахминларга кўра икки нафар эркак йўлда кетаётган одамга ҳужум қилган.
Жабрланувчи 32 ёшли Ўзбекистон фуқароси бўлиб чиқди. У омон қолган ва шифохонага ётқизилган. Жиноятчилар эса кутилмаганда ҳуқуқни муҳофаза қилиш ходимлари томонидан ҳужжатлар текшириш жараёнида ўзини фош қилиб қўйган.
Ҳужум қилган шахсларнинг танасида свастикали татуировка мавжуд ва кийимлари ҳам миллатчилар гуруҳиникидек. Тинтув вақтида буюмлар орасидан кастет ва пичоқлар чиққан.
Тергов қўмитаси суриштирув ишларини давом эттирмоқда.
Skinhead, сўзлашувда Skin (инглиз тилида «skin» — тери ва «head» — бош) ёки «тақирбош» — 20-асрнинг 60 йилларида Лондонда келиб чиққан ёшлар субмаданиятининг вакили. 1969 йил бу субмаданият оммавийлашувининг чўққиси деб ҳисобланади.
Изоҳ (0)