Sankt-Peterburgda O‘zbekiston fuqarosi “taqirboshlar” hujumiga uchradi
“Taqirboshlar” (Skinhead) juftligi 17-sentabr kuni oqshomda Sankt-Peterburg shahrining Krasnogvardeyskiy tumanida o‘zbek muhojiriga hujum qildi. Bu haqda “78.ru” xabar berdi.
Voqea soat 23:30 larda Sredneoxtin ko‘chasidagi 16/27-uylar atrofida ro‘y bergan. Taxminlarga ko‘ra ikki nafar erkak yo‘lda ketayotgan odamga hujum qilgan.
Jabrlanuvchi 32 yoshli O‘zbekiston fuqarosi bo‘lib chiqdi. U omon qolgan va shifoxonaga yotqizilgan. Jinoyatchilar esa kutilmaganda huquqni muhofaza qilish xodimlari tomonidan hujjatlar tekshirish jarayonida o‘zini fosh qilib qo‘ygan.
Hujum qilgan shaxslarning tanasida svastikali tatuirovka mavjud va kiyimlari ham millatchilar guruhinikidek. Tintuv vaqtida buyumlar orasidan kastet va pichoqlar chiqqan.
Tergov qo‘mitasi surishtiruv ishlarini davom ettirmoqda.
Skinhead, so‘zlashuvda skin (ingliz tilida “skin” — teri va “head” — bosh) yoki “taqirbosh” — 20-asrning 60-yillarida Londonda kelib chiqqan yoshlar submadaniyatining vakili. 1969-yil bu submadaniyat ommaviylashuvining cho‘qqisi deb hisoblanadi.
