Тўхтамаётган «Ливерпуль», уйғонган «Челси» ва «Тоттенҳэм», «канарейкалар»дан тарсаки еган «Ман Сити». АПЛда тур тафсилотлари

Футбол бўйича Англия Премьер лигасининг 5-тури 14—16 сентябрь кунлари бўлиб ўтди. Одатга кўра тур тафсилотларини бир саҳифага жойлашга ҳаракат қилдик.

«Ливерпуль»—«Ньюкасл»

Турнинг илк ўйини «Энфилд»да бўлиб ўтди. 4 та турдан сўнг йўқотишсиз одимлаётган Юрген Клопп шогирдлари бу сафар «Ньюкасл»ни синовдан ўтказди. Ўйин «қизиллар» учун омадсиз бошланди. 7-дақиқада меҳмонлар аъзоси Йетро Виллемс гол уриб, жамоасини ҳисобда олдинга олиб чиқди. 28-дақиқага келиб Садио Мане Эндрю Робертсоннинг узатмасини голга айлантирди. Орадан 12 дақиқа ўтиб Роберто Фирминонинг узатмасидан сўнг дарвозабон билан бирга бир чиқиб борган Мане дублга эришди ва мезбонларни ҳисобда олдинга олиб чиқди. Ўйинга якуний нуқтани қўйиш Муҳаммад Салоҳга насиб этди. Мисрлик ҳужумчи 72-дақиқада Фирминонинг заргарона узатмасини кўкка совурмади. Натижада Клопп жамоаси кетма-кет 5 та ғалабани ўзиники қилди ва мусобақа жадвалида якка пешқадам бўлиб турибди.

«Тоттенҳэм»—«Кристал Пэлас»

Кетма-кет уч турда ғалаба қозона олмаган Маурисио Почеттино шогирдлари бешинчи турда бор аламини «Кристал Пэлас»дан олиб қўя қолди. «Тоттенҳэм» «бургутлар» дарвозасига жавобсиз 4 та гол урди. Қизиғи, голларнинг барчаси биринчи бўлимнинг ўзида урилди. Голлардан иккитасига қитъадошимиз Сон Ҳён Мин муаллифлик қилган бўлса, Эрик Ламела ҳам ўз ҳисобига битта гол ёздириб қўйди. Яна бир гол эса Серж Орьенинг фаоллиги сабаб юзага келди. Фақат уни «Пэлас» ҳимоячиси Патрик ван Анҳолт ўз дарвозасига жойлаб қўйди. Шу тариқа «шпорлар» ўз ҳисобидаги очколари сонини 8 тага етказиб, тўплар нисбатига кўра мусобақа жадвалида 3-ўринга кўтарилиб олди.

«Манчестер Юнайтед»—«Лестер»

Ўзининг аввалги мавқейини қайтариш ҳаракатидаги «Манчестер Юнайтед» мазкур турни ўз майдонида «тулкилар»га қарши ўтказди. «Олд Траффорд» ўтган ўйинда мухлислар атиги битта гол кўрди, холос. У ҳам биринчи бўлимнинг 8-дақиқасида пенальтидан урилди. Унга Маркус Рэшфорд муаллифлик қилди. «Қизил иблислар» ушбу ғалабадан сўнг ҳисобидаги очколари сонини «Тоттенҳэм»ники каби 8 тага етказиб олди.

«Вулверҳэмптон»—«Челси»

Турнинг энг серҳмаҳсул ўйини «бўрилар» ва «аристократлар» ўртасида кечди. Аввалги турда «Шеффилд Юнайтед» билан дуранг қайд этиб, мухлисларини ранжитган «Челси» бу сафар қойилмақом ўйин намойиш этди. Аввалига 31-дақиқада Томори чиройли ва аниқ зарбаси билан Лондон клубини ҳисобда олдинга олиб чиқди. Орадан 3 дақиқа ўтиб, Тэмми Абраҳам ҳисобни 0:2 кўринишига келтирди. 41-дақиқада яна ўша Темми ўз ҳисобига иккинчи голни ёздириб қўйди. Томонлар танаффусга 0:3 ҳисобида йўл олди. 55-дақиқада Абраҳам ҳет-трикка эришди. 69-дақиқада тиниб-тинчимаган Темми ўз дарвозасига ҳам гол уриб, автогол соҳибига айланди. 85-дақиқада эса ёзги трансферлар вақтида «Милан»дан олиб келинган Патрик Кутроне «бўрилар»нинг ўйиндаги иккинчи голига муаллифлик қилди. Беллашувга якуний нуқтани эса сўнгги дақиқаларда Мэйсон Маун қўйди — 2:5. Қайд этиш жоиз, «Челси»нинг ушбу ўйиндаги барча голини клуб академияси тарбияланувчилари киритишга эришди.

«Норвич»—«Манчестер Сити»

Тур сенсацияси сўзсиз Нориж шаҳрида қайд этилди. Амалдаги чемпион «Манчестер Сити» Чемпионшип ғолиби бўлган ҳолда Премьер Лигага қайтган «Норвич» меҳмони бўлиб мағлубиятга учради. Аввалига 18-дақиқада Кенли Макклин мезбонларни ҳисобда олдинга олиб чиқди. Орадан 10 дақиқа ўтиб Тодд Кэнтуэлл ҳисобни 2:0 кўринишига келтирди. Биринчи бўлим якунида эса Серхио Агуэро ҳисобни қисқартиришга эришди. Иккинчи бўлим аввалида эса АПЛда жавлон ураётган Теему Пукки Эдерсон дарвозасига ҳам гол урди. Қайд этиш жоиз, у бунга қадар «Ливерпуль» ва «Челси» каби грандлар дарвозасини ҳам ишғол қилганди. Гвардиола шогирдлари эса мағлубиятдан қутулиш илинжида қилган тинимсиз ҳаракатлари фақатгина 88-дақиқага келиб ўз мевасини берди. Родри узоқ масофадан аниқ зарба бериб, ҳисобни қисқартирди. Аммо ундан кўпига «шаҳарликлар»нинг кучи ҳам вақти ҳам етмади.

«Уотфорд»—«Арсенал»

Дастлабки икки турда кетма-кет ғалабаларни қўлга киритиб, мухлислари қалбида келажакка бўлган умидни ёққан «Арсенал» бу сафар ўша умидни яна сўниши йўлида бир қадам ташлади. «Уотфорд» меҳмони бўлган Унаи Эмери шогирдлари бу сафар тайёр ғалабани қўлдан бой берди. Пьер-Эмерик Обамеянгнинг 11 дақиқа ичида урган иккита голига мезбонлар иккинчи бўлимда Том Клеверли ва Роберто Перейраларнинг голлари билан жавоб қайтарди. Қайд этиш жоиз, мезбонларнинг иккала голида ҳам «Челси»ни «Арсенал»га алмаштирган Давид Луиз хатога йўл қўйди. Шу тариқа «тўпчилар»нинг ғалабасиз ўйинлар серияси учта ўйинга етди.

Тур рақамларда

• 10 учрашувда жами 32 та гол урилди
• 18 та гол мезбонлар, 16 таси эса меҳмонлар ҳисобига ёзилди
• Энг сермаҳсул баҳс: «Вулверҳэмптон» — «Челси» 2:5
• Фақат 1 та ўйинда 0:0 ҳисобидаги дуранг қайд этилди: «Астон Вилла» — «Вест Ҳэм»
• Фақатгина 2 та ўйинда меҳмонлар ғалаба қозонди.
• 4 нафар футболчи дублга эришди: Садио Мане, Каллум Уилсон, Сон Ҳён Мин, Пьер Эмерик Обамеянг
• 1 нафар футболчи ҳет-трик қайд этди: Тэмми Абраҳам
• Ортда қолган 5 турдан сўнг очко йўқотмаган битта клуб қолди — «Ливерпуль»

Мусобақа жадвали

Тўпурарлар рўйхати