Президент Шавкат Мирзиёев раислигида 17 сентябрь, сешанба куни саноатни жадал ривожлантириш, маҳаллийлаштириш даражасини ошириш ва кўламини кенгайтириш масалаларига бағишланган видеоселектор йиғилиши бўлиб ўтди. Унда мамлакат саноатини замон талаблари асосида ривожлантириш, маҳсулотлар рақобатбардошлигини ошириш ва турини кенгайтириш масалалари муҳокама қилинди, дея хабар бермоқда Президент матбуот хизмати.
«Экспортбоп ва импорт ўрнини босадиган маҳсулотлар ишлаб чиқариш, юқори қўшилган қиймат яратишга йўналтирилган саноат сиёсатини юритишимиз зарур. Мавжуд хом ашё ва имкониятлардан самарали фойдаланган ҳолда, маҳаллийлаштириш даражасини чуқурлаштириш ва кўламини кескин кенгайтириш ушбу саноат сиёсатининг негизи бўлиши керак», — деди видеоселекторда Президент Шавкат Мирзиёев.
Тармоқлар ва йирик корхоналарда ишлаб чиқаришни маҳаллийлаштириш ҳамда саноат кооперациясини кенгайтириш масаласи муҳокама қилинар экан, 2019 йилнинг ўтган даврида янги лойиҳалар доирасида бор-йўғи 1 миллиард долларлик маҳаллийлаштирилган маҳсулот ишлаб чиқарилгани қониқарсиз деб баҳоланган.
Бу борадаги ишлар суст ташкил этилган. «Ўзмахсусмонтажқурилиш» акциядорлик компанияси, «Ўзёғмойсаноат» уюшмаси, «Ўзбекистон миллий электр тармоқлари» акциядорлик жамияти каби корхоналар фаолияти танқид қилинган.
Президентнинг «Саноат кооперациясини янада ривожлантириш ва талаб юқори бўлган маҳсулотлар ишлаб чиқаришни кенгайтириш чора-тадбирлари тўғрисида»ги қарорида белгиланган тайёр маҳсулотлар, бутловчи буюмлар, хом ашё, материалларнинг янги турларини ўзлаштириш бўйича ишлар ҳам таҳлил қилинган.
Вазирлар Маҳкамаси, Иқтисодиёт ва саноат вазирлигига саноат кооперациясини ривожлантириш бўйича амалий чоралар кўриш, электрон кооперация порталини тезроқ ишга тушириб, саноат маҳсулотлари етказиб бериш шартномаларини электрон тузиш кўламини кенгайтириш вазифаси қўйилди.
Изоҳ (0)