Бепул метро куни станциялараро ўтиш йўлакларида кўргазмалар ва мусиқали чиқишлар, поезд вагонларида эса тонгда ва оқшом пайти раққослар, қўғирчоқбозлар, кўзбойлоғичлар, кўча мусиқачилари ва опера хонандаларининг санъатидан баҳраманд бўлиш мумкин.
Тошкент шаҳри илк бора қўшилган Европа ҳаракатланиш ҳафтаси доирасида 19 сентябрь, пайшанба куни «Ўзбекистон темир йўллари» компанияси ҳамда Тошкент метрополитени томонидан Бепул метро куни ўтказилади. Бу ҳақда «Ўзбекистон темир йўллари» АК матбуот хизматига таяниб «Gazeta.uz» хабар бермоқда.
Шу куни «Ойбек» ва «Мингўрик» бекатларига ўтиш йўлагида тонгги соат 8:00 да театрлаштирилган-мусиқий саҳна кўринишлари намойиш қилиниши бошланади. Симфоник оркестрнинг чиқиши 17:00—19:00 оралиғида ўтиши режалаштирилган.
Кун давомида «Амир Темур хиёбони» ҳамда «Юнус Ражабий» бекатларига ўтиш йўлагида торли камер квартети ижроси ҳамроҳлигида санъацҳунослар иштирокида расмлар галереяси ўтказилади.
Тошкент метрополитени тарихи ва ривожланиш босқичлари ҳақида «Пахтакор» ва «Алишер Навоий» бекатларига ўтиш вестибюлидаги фотокўргазмани томоша қилиб маълумот олиш мумкин.
Бундан ташқари, бекатдан бекатга ўтаётган йўловчилар соат 10:00—12:00 ҳамда 20:00—22:00 оралиғида биргаликда флешмоб қилади. Рақс жамоалари метроплитен йўналишларининг барча вагонларида чиқишлар қилади. Кўча мусиқачилари гитара, кахон ва саксафонда куйлар ижро қилади, опера хонандаларининг ижроси мусиқий флешмобнинг иккинчи қисмига айланади.
Болалар учун мимлар, кўзбойлоғичлар ҳамда суперқаҳрамон ва мултфильм персонажлари кийимларидаги қўғирчоқбозларнинг чиқишлари ташкил қилинади.
Изоҳ (0)