Бошқа давлатларда меҳнат миграциясида бўлиб турган Ўзбекистон фуқаролари ҳақидаги маълумотлар жорий йил 1 октябридан ягона манбалар базасида жамланади. Бу ҳақда Ташқи меҳнат миграцияси агентлиги бошлиғи вазифасини бажарувчи Бахтиёр Турсунов маълум қилди, дея хабар беради «Gazeta.uz».
Мазкур маълумотлар умумлашган Labor-migration дастурий комплекси «Ягона миллий меҳнат тизими» ахборот тизимига киритилади.
Мигрантлар ҳақида маълумотлар тўплаш билан ҳозирда ИИВ, ТИВ, Бандлик вазирлиги, ДХХ ва Чегарани қўриқлаш қўмитаси шуғулланмоқда. Маълумотлар бир неча базаларда тўпланган ва фақат хизмат доирасида фойдаланиш мумкин. Меҳнат мигрантлари статистикаси бўйича автоматлаштирилган таҳлил шу пайтгача бўлмаган.
Бандлик ва меҳнат муносабатлари вазирининг биринчи ўринбосари Эркин Муҳитдиновга кўра, Ўзбекистонда меҳнатга лаёқатли аҳолининг йиллик ўсиши 600-700 минг кишини ташкил этмоқда. Мамлакат иқтисодиёти бу миқдордаги иш ўринларини таъминлашни уддасидан чиқа олмайди. Меҳнат миграцияси эса вазиятдан чиқиш йўли бўлиши мумкин.
Бахтиёр Турсуновнинг қайд этишича, 2,5 миллион ўзбекистонлик ёки мамлакат аҳолисининг 7 фоиздан ортиғи меҳнат мигрантлари ҳисобланади. Улардан 2 миллиондан кўпроғи Россияда бўлиб турибди. Меҳнат мигрантларининг йиллик пул ўтказмалари 5,1 миллиард доллар ёки мамлакат ялпи ички маҳсулотининг 10 фоизини ташкил этмоқда.
Изоҳ (0)