Қирғизистон мудофаа вазирлиги Бош штабига тегишли Ми-8 вертолёти ноёб ва қимматбаҳо дарахтларни талон-торож қилиш учун фойдаланилган. Бу ҳақда «Turmush» хабар бермоқда.
2016 йилда содир этилган мазкур ҳолат Чуй вилоятининг Соколук туман суди томонидан кўриб чиқилди. Уч нафар судланувчига «Ўта ноёб дарахтларни кесиш, юклаш, қайта ишлаш, харид қилиш ёки сотиш» моддаси бўйича айблов эълон қилинди. Бироқ ушбу модда 2019 йил 1 январдан кучга кирган янги Жиноий кодексда жиноий жавобгарликдан чиқарилгани учун улар жавобгарликдан озод қилинди.
Суд жараёнида маълум бўлишича, 2016 йил май ойида судланувчилар Жанубий Корея фуқаросига Белогорка дарасидан бир неча туп Туркистон арчасини кесиб беришни ваъда қилади. Улардан бири турфирма директорига Давлат ўрмон қўмитаси лицензия-рухсат бериш комиссияси раис ўринбосарининг олдинроқ сотиб олинган арчаларга рухсат хатини кўрсатади ва бу Туркистон арчасини олиб кетишга рухсат ҳужжати эканлигини айтади. Турфирма директори бу алдовга учиб, вертолёт тақдим этишга кўнади ва уни Бош штабдан соатига 2,8 минг долларга ижарага олади.
Бошқа айбланувчи бир неча КамАЗ машинасини ёллайди ва ҳайдовчиларга ўтин юклашларини билдиради. Вертолётда тоғдан 5 та дарахт олиб тушилганида бундан норози бўлган ҳайдовчиларга барча рухсат қоғозлари борлигини даъво қилади. Якунда гумонланувчилар маҳаллий аҳоли ва Соколук туман ИИБ ходимлари томонидан қўлга олинади.
Изоҳ (0)