Ҳужум оқибатида ёнғинлар келиб чиққан. Жабранувчилар ҳақида маълумот йўқ. Портловчи ускуналар ўрнатилган дронлар 14 сентябрга ўтар кечаси Saudi Aramco объектларига ҳужум қилган; тонгга яқин Саудия расмийлари алангани қуршаб олишга муваффақ бўлингани ҳақида маълум қилди. Al-Arabiya канали ёнғинлар вақтида ҳеч ким жиддий шикастланмагани ҳақида хабар берди, бироқ жабрланувчилар ҳақида расмий маълумот йўқ. Reuters агентлиги ўз мухбирига асосланиб хабар беришича, Абкаикдаги нефтни қайта ишлаш заводи олдида 15 га яқин тез ёрдам машиналари бўлган.
https://twitter.com/QanatAhrar/status/1172776446135287808
Ҳужум учун жавобгарликни Ямандаги исёнчи хусийлар ўз зиммасига олди. Улар ҳужум вақтида 10 та дрондан фойдаланилганини ва бу Саудия Арабистонининг Ямандаги қуролли можародаги иштироки учун жавоб эканини маълум қилди. Хусийлар бунгача камида икки марта Саудиянинг нефть объектларига ҳужум қилган эди. Сўнгги ҳужум август ойида юз берган эди. Бу ҳужум оқибатида Шейба конида ёнғин келиб чиққан (бу кон ҳам Saudi Aramco’га тегишли), аммо нефть қазиб олиш ҳажмига таъсир кўрсатмаган эди. Bloomberg’нинг ёзишича, жорий ҳамла Саудия Арабистони нефть конларига сўнгги 10 йил ичида амалга оширилган энг катта ҳужум бўлган (авваллари мамлакат нефть конларига, масалан, «Ал-Қоида» ҳужум қилган).
Ҳужумдан сўнг Саудия Арабистонида нефть қазиб олиш ҳажми икки баробарга қисқарди, дея таъкидламоқда Bloomberg ва Reuters манбалари. Ҳар иккала агентлик суҳбатдошларининг маълум қилишича, Saudi Aramco ҳужумдан сўнг қазиб олишни беш миллион баррелгача камайтирган. Бу Саудия Арабистонида қазиб олинадиган кунлик нефть миқдорнинг 50 фоизи, жаҳон бўйича эса — 5 фоизидир. Айни вақтда, Bloomberg маълумотларига кўра, ишлаб чиқариш суръатлари 48 соат ичида тўлиқ қайта тикланиши мумкин. Reuters’нинг манбалари ҳужум нефть экспорти ҳажмига ҳам таъсир кўрсатганини таъкидлаган, бироқ аниқ рақамлар айтилмаган. Ҳодиса нефтнинг жаҳон бозоридаги нархларига таъсир кўрсатганича йўқ, чунки дам олиш кунлари биржаларда савдолар ўтказилмайди.
Saudi Aramco — нефть сотиш бўйича жаҳондаги энг йирик компания. У Саудия Арабистонининг давлат компанияси бўлиб, 2018 йили жаҳондаги энг сердаромад ширкат сифатида тан олинган. Saudi Aramco’нинг соф фойдаси 111 миллиард долларни ташкил этган. Бу, масалан, Apple, Google ва ExxonMobil’нинг биргаликдаги кўрсаткичларидан ҳам кўпроқ. Saudi Aramco ҳали биржага чиқмаган; компания яқин вақт ичида ўз акцияларини биржага бирламчи чиқаришни (IPO) режалаштирмоқда. Bloomberg маълумотларига кўра, бу ноябрь ойидаёқ юз бериши мумкин.
Хусийларни Эрон қўллаб-қувватлайди. Саудия Арабистони ва АҚШ сўнгги ойларда Форс кўрфазида танкерларга уюштирилаётган ҳужумларда айнан Эронни айблаб келмоқда. Ҳужумлар май ва июнь ойларида юз берган, Саудия Арабистони ва бошқа мамлакатлардан келаётган кемалар нишонга олинган эди. Ушбу ҳужумлар АҚШ Эрон билан эришилган ядровий келишувдан чиқиб, ушбу мамлакатга нисбатан санкцияларни қайта тиклаганидан сўнг бошланган эди.
Изоҳ (0)