Россия «Буревестник» қанотли ракетаси синовларини камида беш марта ўтказган ва уларнинг бари муваффақиятсизлик билан тугаган. Бу ҳақда АҚШ разведка хизматларининг тегишли ҳисоботи билан таниш манбага асосланиб, CNBC хабар бермоқда.
Америка разведкаси маълумотларига кўра, синовлар 2017 йилдан бошлаб ўтказила бошланган. Энг узоқ парвоз икки дақиқа давом этган, энг қисқаси эса тўрт сониядан ошмаган.
CNBC манбаларининг қўшимча қилишича, Россия ушбу ракеталар 2025 йилда мамлакат қуролли кучлари томонидан фойдаланишга қабул қилиб олиниши учун лойиҳа устида ишлашни тезлаштиришни мақсад қилган.
Август ойи бошида Россиянинг Северодвинск шаҳри яқинидаги полигонда юз берган ва камида беш кишининг ўлимига сабаб бўлган портлаш айнан «Буревестник» ракетаси синовлари билан боғлиқ бўлиши мумкинлиги айтилган эди.
CNBC манбалари тахминига кўра, ҳодиса денгиз тубидан ракетани олиб чиқишга уриниш вақтида юз берган — ракета бундан аввалги муваффақиятсиз парвози вақтида денгиз қулаган бўлган.
Россия Мудофаа вазирлиги 2018 йил июлида «Буревестник» ракетасининг учирилиши акс этган видеони эълон қилган эди.
Изоҳ (0)