14 сентябрь куни соат 08:57 да Тошкент шаҳар Учтепа тумани Катта Хирмонтепа кўчаси 3D-уйда жойлашган Doutsche Servis компаниясига тегишли корхона ҳудудида жойлашган тикувчилик цехида ёнғин бўлаётганлиги ҳақида ёнғин-қутқарув хизматига хабар келиб тушган.
Давлат ёнғин хавфсизлиги хизмати ахборотига кўра, воқеа жойига 8 та асосий ва битта махсус ёнғин ўчириш техникалари жалб этилган. Биринчи бўлинмалар чақирилган манзилга соат 09:03 да етиб борган вақтда ишлаб чиқариш цехи очиқ аланга аралаш қуюқ тутун билан ёнаётганлиги маълум бўлган.
Кўрилган тезкор ҳаракатлар натижасида ёнғин соат 09:25 да қуршаб олиниб, соат 09:33 да тўлиқ бартараф этилган. Ёнғин оқибатида Doutsche Servis ҳудудудида ижара асосида фаолият юритаётган «Шамс Осиё Оригинал» корхонасига қарашли тикув цехининг 400 квадрат метр майдонда томи, ички қисмидаги ишлаб чиқариш ускуналари ва унда сақланаётган тайёр ҳамда ярим тайёр трикотаж маҳсулотлари ёниб зарарланган.
ДЙХХдан маълум қилишларича, ёнғин ҳақида кеч хабар берилганлиги сабабли ёнғиннинг майдони кенгайиб кетган. Ҳодиса тан жароҳати олганлар ва ҳалок бўлганлар йўқ. Ёнғиндан маълум миқдорда тикув ускуналари, тайёр ва ярим тайёр трикотаж маҳсулотлари сақлаб қолинган.
Ёнғинни сабаби ишлаб чиқариш цехининг шифтидан ўтказилган электр тизимида юзага келган авария ҳолатидан, деб гумон қилинмоқда. Ёнғин етказган моддий зарар миқдори аниқланмоқда.
Изоҳ (0)