Сарвар Бобохўжаев Президент мактаблари агентлиги директори, Нозима Файзибоева унинг биринчи ўринбосари этиб тайинланди

Шу кунгача Ўзбекистон халқ таълими вазири ўринбосари сифатида ишлаб келган Сарвар Бобохўжаев Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлиги директори лавозимига тайинланди. Бу ҳақдаги тегишли қарор Президент Шавкат Мирзиёев томонидан 11 сентябрь куни имзолангани «Дарё»нинг ҳукуматдаги манбаси томонидан тасдиқланди.

Ўз навбатида, Адлия вазирлигининг Telegram’даги «Ҳуқуқий ахборот» канали хабарига кўра, Вазирлар Маҳкамасининг 13 сентябрдаги қарори билан Нозима Файзибоева Президент, ижод ва ихтисослаштирилган мактабларни ривожлантириш агентлиги директорининг биринчи ўринбосари этиб тайинланган.

Сарвар Бобохўжаев (1978 йилда туғилган) Тошкент давлат техника университети (1998) ва Япония халқаро университетини (2002) тамомлаган. Меҳнат фаолиятини 1997 йили «Бакри Узбекистан Телеком» хорижий корхонасида таржимон сифатида бошлаган. 1998—2016 йилларда «Ўзбекинвест» компанияси тизими, Жиззах давлат педагогика институти, Тошкент давлат педагогика университети, Ўзбекистон Миллий университети, Тошкент Сингапур менежментни ривожлантириш институтида турли масъул лавозимларда ишлаган.

Бобохўжаев 2016—2018 йилларда Тошкентдаги Инҳа университетига ректорлик қилган, 2017 йил мартидан то ҳозирги кунга қадар «Ўзбекистон—Жанубий Корея» дўстлик жамияти кенгаши раиси ҳисобланади. 2017 йилдан жорий тайинловга қадар Ўзбекистон халқ таълими вазири ўринбосари сифатида ишлаб келаётган эди.

«Буюк келажак» эксперт кенгаши аъзоси ҳисобланган Нозима Файзибоева (1984 йилда туғилган) Тошкент давлат юридик университети (2004) ва Женева университетини (2009) тамомлаган. Швейцариянинг Sidley Austin халқаро юридик компаниясида юрист сифатида ишлаган. Ўзбекистон ва МДҲ мамлакатларида маданият ва таълимни қўллаб-қувватлаш жамғармаси таъсисчиси. Юристлар малакасини ошириш ва ўқитиш соҳасида Ўзбекистон Адлия вазирлиги билан ҳамкорлик қилади.

Эслатиб ўтамиз, Президент, ижод ва ихтисослаштирилган мактабларни ривожлантириш агентлиги давлат раҳбарининг 9 сентябрдаги фармони билан ташкил этилган. 10 сентябрь куни Шавкат Мирзиёев Тошкентда очилган илк Президент мактабига ташриф буюрган эди.