Тошкентнинг Шайхонтоҳур тумани «Чарх Новза» маҳалласида 7 сентябрь куни шахси аниқланмаган уч киши тўрт қаватли турар жойнинг иккинчи қаватидаги хонадондан ичида катта миқдорда пул бўлган сейфни ўғирлаб кетган, дея хабар бермоқда Тошкент шаҳар ИИББ матбуот хизмати.
Бош бошқармадан маълум қилишларича, ушбу жиноятни фош этиш устида тезкор-тергов гуруҳи иш олиб бормоқда. Таъкидланишича, жиноят қисқа муддатда фош этилиши учун бош бошқарма ходимлари томонидан барча имкониятлар ишга солинади, уни содир этганлар қўлга олиниб, жавобгарликка тортилади.
«Шу билан бирга мазкур жиноятга алоқадор шахсларга эслатиб қўймоқчимизки, Жиноят кодексининг 55-моддасида, айбни бўйнига олиш жазони енгиллаштирувчи ҳолат деб топилган. Ушбу жиноятга алоқадор шахсларга чин кўнгилдан пушаймон бўлиб, энг яқин ички ишлар бўлимига келишларини ёки 102 рақамига қўнғироқ қилишларини ва жиноятни фош этилишида иштирок этишларини таклиф қиламиз. Акс ҳолда жавобгарликка тортилиш вақтида жазо енгиллаштирилмайди», — дейилади Тошкент шаҳар ИИББ баёнотида.
Изоҳ (0)