Ўзгидрометда марказ вакилларининг Марказий Осиё Минтақавий экологик маркази (МОМЕМ) делегацияси билан учрашув ўтказилди, деб хабар беради марказ матбуот хизмати.
Унда CAMP4ASB (Орол денгизи ҳавзасида иқлим ўзгаришига мослашиш ва унинг оқибатларини юмшатиш дастури) минтақавий лойиҳасини амалга ошириш доирасида 50 та автоматик метеорологик станция етказиб бериш юзасидан шартнома имзоланди.
CAMP4ASB лойиҳаси Марказий Осиё мамлакатларида етакчи манфаатдор томонлар учун иқлим ўзгариши борасидаги билимлар ва маълумотлардан кенг фойдаланиш имкониятини яхшилаш, шунингдек, иқлим ўзгариши соҳасидаги инвестициялар ва техник салоҳиятни кучайтириш орқали иқлим ўзгариши оқибатлари билан боғлиқ муаммоларни ҳал этишга йўналтирилган.
Лойиҳа минтақавий ва миллий компонентлардан таркиб топган. Минтақавий қисмнинг асосий вазифаларидан бири иқлим ўзгаришига мослашиш ҳамда кам углеродли ривожланишга ўтиш бўйича ахборот-таҳлилий базани шакллантиришга минтақавий ва миллий миқёсда техник кўмак кўрсатиш, иқлим ўзгариши муаммолари билан шуғулланувчи идораларни дастурий воситалар ҳамда асбоб-ускуналар билан таъминлашдан иборат.
Ўзгидромет Орол денгизи ҳавзасида иқлим ўзгаришига мослашиш ва унинг оқибатларини юмшатиш дастурининг миллий мувофиқлаштирувчиси сифатида МОМЕМ билан яқиндан ҳамкорлик қилади.
Таъкидлаш жоизки, ҳозирги вақтда Ўзгидрометда ҳам давлат инвестиция лойиҳалари, ҳам грант маблағлари ҳисобига гидрометеорологик хизмат фаолиятини такомиллаштириш ва уни модернизациялаш бўйича қатор чора-тадбирлар амалга оширилмоқда.
Асбоб-ускуналар етказиб бериш бўйича Ўзгидромет ва МОМЕМ ўртасида имзоланган шартнома Жаҳон банки маблағлари ҳисобига молиялаштирилади. Ўзгидрометнинг вилоятлардаги станция ва постларига ўрнатиладиган автоматик метеорологик станциялар иқлимий мониторинг тизимини яхшилашга — кузатувлар тезкорлиги ва маълумотларнинг аниқлиги ортишига ва оқибатда гидрометеорологик хизмат кўрсатиш сифатининг яхшиланишига хизмат қилади.
«Учрашув давомида Ўзгидромет бош директорининг биринчи ўринбосари Баҳриддин Нишонов ва МОМЕМ ижрочи директори Зафар Махмудов амалга оширилган ишларнинг нечоғли муҳимлигини таъкидлади ва бу борадаги кейинги ҳамкорлик юзасидан келишиб олди», — дейилади хабарда.
Изоҳ (0)