Украина Олий радаси 2020 йилдан конституцияга киритиладиган депутатлик дахлсизлигини бекор қилувчи ўзгартиришларни маъқуллади, деб хабар беради «Интерфакс-Украина».
373 та халқ депутати янги қонун лойиҳасини маъқуллаган. Ўзгаришларни «Халқ хизматчиси» партиясидан 252 нафар депутат қўллаб-қувватлаган.
Қонун кучга кирганидан сўнг Украина конституциясидан депутатларни парламент розилигисиз жиноий жавобгарликка тортиш, ҳибсга ёки қамоққа олишни тақиқловчи депутатлик дахлсизлиги кафолатланганлиги тўғрисидаги низом чиқариб ташланади.
Депутатлар парламент ва унинг органларида овоз беришда ҳамда ўз фикрини баён қилганликлари учун қонун олдида жавобгар бўлмайди. Бироқ, ҳақорат ёки туҳмат учун жавобгарлик бундан мустасно.
«Мен яна бир бор барча афсоналар ва сиёсий манипуляцияга нуқта қўймоқчиман. Депутатлар мустақилликни сақлаб қолади. Улар сиёсий қарорлар, овоз бериш ёки исталган турдаги сиёсий ва оммавий чиқишларга жавобгар бўлмайди», — деди Украина президенти Владимир Зеленский 3 сентябрь куни парламентда сўзлаган нутқида.Аввалроқ Владимир Зеленский президентликнинг илк 100 кунидан сўнг «Халқ хизматкори» сериалида бош вазир ролини ижро этган актёрга интервью бергани ҳақида хабар бериб, интервьюнинг қисқа баёнини эълон қилгандик.
Изоҳ (0)