Британиялик кўча рассоми Бэнксининг асари Парижда ўғирлаб кетилди, деб хабар берди Meduza.
Қайд этилишича, 2 сентябрга ўтар кечаси номаълум шахслар Жорж Помпиду миллий санъат ва маданият марказининг ерости автотураргоҳи кўрсаткичининг орқа томонига чизилган граффитини кесиб олиб кетган.
Расмда юзида шарф ва панжасида пичоқ бўлган каламуш акс этган эди.
Аноним рассом бу граффитини 2018 йилнинг июнида яратган ва ўзининг Instagram’даги саҳифасида эълон қилган эди.
Бэнкси ушбу суратни 1968 йилда Парижда юз берган талабалар норозилик намойишининг 50 йиллигига бағишлаган.
Рассомнинг фикрича, айнан ўша пайтда кўча рассомчилик санъати дунёга келган.
Маълумот учун, бу Парижда 2019 йилнинг бошидан бери Бэнксининг асарлари ўғирланиши билан боғлиқ иккинчи ҳолат. Январь ойида номаълум шахслар «Батаклан» концерт залининг орқа эшигига чизилган граффитисини кесиб олиб кетган эди.
Изоҳ (0)