АҚШ Вакиллар палатасининг суд ишлари бўйича қўмитаси президент Дональд Трампнинг сукут сақлаш эвазига у билан алоқада бўлган аёлларга пул берилиши билан боғлиқ ишга дахлдорлигини текшириши мумкин. Бу ҳақда The Washington Post хабар берди.
«РБК»нинг ёзишича, қўмита 2016 йилда порноактриса Сторми Дэниэлс ва Playboy собиқ модели Карен Макдугалга пул тўлашга жалб этилган гувоҳларни сўроқ қилишни режалаштирмоқда.
Вакиллар палатасидан бўлган демократлар ҳозирда Трампни бу воқеанинг иштирокчиси сифатида тан олиш учун етарли далиллар бор деб ҳисобламоқда.
Трампнинг 2006—2008 йилларда шахсий ҳуқуқшуноси бўлган Майкл Коэн сайловолди кампаниясини молиялаштириш қоидаларини бузиш ва конгрессга ёлғон кўрсатма беришда айбланиб, 2018 йил декабрида 3 йилга озодликдан маҳрум этилган.
У 2016 йилда Дэниэлс ва Макдугалга Трамп билан ишқий муносабатлари ҳақида сукут сақлаш учун тўловларни ташкил қилганини тан олган. Ҳуқуқшуноснинг сўзларига кўра, Трамп штаби ва Коэн билан келишилган ҳолда порноактриса ундан 130 минг доллар, Playboy модели эса American Media Inc компаниясидан 150 минг доллар олган. Коэн, шунингдек, Сенат разведка қўмитасига сохта маълумотлар тақдим этганликда айбдор деб топилган.
Трампнинг ўзи эса маъшуқаларининг сукут сақлаши учун пул тўлаганини «кейинроқ» билгани ва уларга пул ўтказишга раҳбарлик қилмаганини айтган.
Изоҳ (0)