Ўзбекистоннинг халқаро резервлардаги пули ҳозирда 22 млрд долларни ташкил этади — унинг ярми олтин, ярми эса валюта кўринишида. Бу ҳақда Ахборот ва оммавий коммуникациялар агентлигида Молия вазирлиги ва Марказий банк мутасаддилари иштирокида бўлиб ўтган очиқ мулоқотда маълум қилинди.
«Фақат банкларга депозит қўявермасдан босқичма-босқич молиявий бозорларга чиқишни ҳам йўлга қўйиш керак. Чунки шу орқали депозитлардан кўра кўпроқ фойда олиб келиш имкониятлари мавжуд. Олтинни ҳам аслида кўп ушлаб туришимиз керак эмас. Олтин ўзи кўп, у бизга ҳеч қанақа пул келтирмайди. Олтинни пул келтирадиган, фоиз ҳисобида фойда келтирадиган нарсаларга тикиш керак», — деди молия вазири ўринбосари Одилбек Исоқов.
Қайд этилишича, 30 июнь ҳолатига кўра, давлат ички қарзи 5,4 миллиард доллар эквивалентини ташкил этган. Шундан 97 фоиз қарз ҳукумат томонидан кафолатланган. Қолган 3 фоиз қарз эса ҳукумат томонидан жалб этилган.
«Тикланиш ва тараққиёт жамғармаси маблағлари тижорат банклари орқали катта давлат ташкилотларига йўналтирилган. Шу вазиятда давлат қарз ‘риск’ларига кафолат берган. Гарчи ҳукумат пули давлат ташкилотига кетса-да, биз буни қарз, деб тан олдик. Ҳар қандай ‘риск’да маблағларни давлат тўлаб бериши керак», — деди Исоқов.
Мутасаддилар 2018 йилдан буён давлат ички капитал бозорда облигацияларни сотувга чиқарганини айтиб ўтди. Жорий йилда облигациялар орқали 1—3 йил муддатга 850 миллиард сўмлик қарз олинган.
Изоҳ (0)