Наманган шаҳридаги «Афсоналар водийси» боғи амфитеатрида вилоят ҳокими Хайрулло Бозоров вилоятдаги олий ва халқ таълими тизими вакиллари билан учрашди. Бу ҳақда «Дарё» мухбири Азизбек Абдувалиев хабар бермоқда.
Мулоқотда асосий эътибор Президент Шавкат Мирзиёев раислигида 23 август куни ўтказилган таълим тизимини ривожлантириш, педагогларнинг жамиятдаги нуфузини оширишга бағишланган видеоселектор йиғилишидан келиб чиқадиган вазифаларга қаратилди.
Вилоятда таълим-тарбия соҳасига инновацион усулларни татбиқ этиш, бунинг учун ривожланган хорижий давлатлар, хусусан, Япония таълим тизимидаги илғор жиҳатларни ўрганиш, барчага ўрнак бўладиган Наманган тажрибасини яратиш, ишлаб чиқиш ва жорий этиш борасидаги масалалар тилга олинди.
—Биз энди мактабларни капитал ва жорий таъмирлаш, уларда замонавий шарт-шароитларни яратишда фақат давлат ёки инвестиция дастурларига кўз тикиб турмаймиз. Бу борада ички имкониятлар ҳам ишга солиниб, маҳаллий ҳокимликлар ҳам ташаббус кўрсатади. Халқаро фан олимпиадаларида иштирок этиб, ғолиб ва совриндор бўлган ўқувчилар, уларнинг устозлари, ҳатто директорини ҳам автомобиль билан тақдирлашни жорий этамиз, — деди Хайрулло Бозоров.
Учрашувда шаҳар ва туманлар халқ таълими бўлимлари раҳбарларига 12 та Spark автомобили берилди. Муносиб натижаларга эришаётган муаллимлар, профессор-ўқитувчилар планшет ва бошқа совғалар билан тақдирланди.
Изоҳ (0)