Ғузорда 39 ёшли аёл 27 ёшли она ва унинг 2 ёшли фарзандини ўлдиришда гумон қилинмоқда. Бу ҳақда «Дарё»га Қашқадарё вилоят ИИБ матбуот хизмати маълум қилди.
Ғузор туман ИИБга 28 август куни «Янгикент» маҳалла фуқаролар йиғини Янгикент қишлоғида яшовчи, 1992 йилда туғилган Х.Р. ва унинг вояга етмаган фарзанди, 2017 йилда туғилган Х.А.нинг жасади соат тахминан 16:30 да топилгани ҳақида хабар келиб тушган.
Ўрганиш давомида яшаш уйи даҳлизида марҳуманинг бўйин соҳаларининг ўнг ёнбош қисмидан чап томон қулоқ соҳасига қадар ўткир тиғли жисм билан кесилган ҳолатининг аломатлари аниқланган. Воқеа жойидан узунлиги 20 сантиметр бўлган қўлбола пичоқ топилган.
ДХХ вилоят бошқармаси, вилоят прокуратураси ва ИИБ томонидан олиб борилган тергов-тезкор ҳаракатлари давомида ушбу қотилликни содир этишда гумонланиб марҳума аёлнинг ҳамқишлоғи, муқаддам судланмаган, уй бекаси, 1980 йилда туғилган И.С. қўлга олинган.
Ушбу холат юзасидан Ғузор тумани прокуратураси томонидан жиноят иши қузғатилиб, тергов ҳаракатлари олиб борилмоқда.
Изоҳ (0)