Namangan shahridagi “Afsonalar vodiysi” bog‘i amfiteatrida viloyat hokimi Xayrullo Bozorov viloyatdagi oliy va xalq ta’limi tizimi vakillari bilan uchrashdi. Bu haqda “Daryo” muxbiri Azizbek Abduvaliyev xabar bermoqda.
Muloqotda asosiy e’tibor Prezident Shavkat Mirziyoyev raisligida 23-avgust kuni o‘tkazilgan ta’lim tizimini rivojlantirish, pedagoglarning jamiyatdagi nufuzini oshirishga bag‘ishlangan videoselektor yig‘ilishidan kelib chiqadigan vazifalarga qaratildi.
Viloyatda ta’lim-tarbiya sohasiga innovatsion usullarni tatbiq etish, buning uchun rivojlangan xorijiy davlatlar, xususan, Yaponiya ta’lim tizimidagi ilg‘or jihatlarni o‘rganish, barchaga o‘rnak bo‘ladigan Namangan tajribasini yaratish, ishlab chiqish va joriy etish borasidagi masalalar tilga olindi.
—Biz endi maktablarni kapital va joriy ta’mirlash, ularda zamonaviy shart-sharoitlarni yaratishda faqat davlat yoki investitsiya dasturlariga ko‘z tikib turmaymiz. Bu borada ichki imkoniyatlar ham ishga solinib, mahalliy hokimliklar ham tashabbus ko‘rsatadi. Xalqaro fan olimpiadalarida ishtirok etib, g‘olib va sovrindor bo‘lgan o‘quvchilar, ularning ustozlari, hatto direktorini ham avtomobil bilan taqdirlashni joriy etamiz, — dedi Xayrullo Bozorov.
Uchrashuvda shahar va tumanlar xalq ta’limi bo‘limlari rahbarlariga 12 ta Spark avtomobili berildi. Munosib natijalarga erishayotgan muallimlar, professor-o‘qituvchilar planshet va boshqa sovg‘alar bilan taqdirlandi.
Izoh (0)