Андижон шаҳрининг «Ўзбегим» маҳалласи, Буюк Турон кўчасида қуриб битказилган 4 та 7 қаватли уй-жойдаги янги хонадонларга 252 та оила кўчиб ўтди. Бу ҳақда «Дарё» мухбири хабар бермоқда.
Ушбу бинолар Отабек Мадазимов раҳбарлик қилаётган «Хокон автоинвест» масъулияти чекланган жамияти қурувчилари томонидан қисқа муддат ичида бунёд этилган.
Хоналар ёруғ, шинам, барча қулайликларга эга. Уйлар алоҳида иситиш тизими ва лифтлар билан жиҳозланган. Ушбу хонадонларда яшовчи аҳоли учун маиший хизмат кўрсатиш шохобчалари ҳамда болалар майдончаси ҳам қуриб битказилган. Бундан ташқари ҳудуд ободонлаштирилиб, намунавий кўринишга келтирилган.
Турар жойларни фойдаланишга топшириш маросимида иштирок этган вилоят ҳокимининг биринчи ўринбосари Абдужаббор Эгамбердиев йиғилганларни байрам билан қутлади. Жорий йил охирига қадар якунланиши кутилаётган Андижон шаҳрининг Навоий, Чўлпон шоҳ кўчалари, Дукчи Эшон кўчасидаги эски уйлар ўрнида 7 ва 12 қаватли 150 та замонавий турар жойларни қуриш ишлари олиб борилаётганлигини қайд этиб, айни вақтда Андижон шаҳрининг Мусаев кўчасида водий вилоятларида дастлабки 16 қаватли уйларни қуриш ишлари бошланганлигини билдирди.
Изоҳ (0)