Журналист Хуршид Далиев Андижон вилоятидаги мутасаддиларни танқид остига олгач, исми-шарифи номаълум шахс унга ўлим билан таҳдид қила бошлаган. Бу ҳақда журналистнинг ўзи «Human.uz» сайтида баёнот билан чиқди.

Фото: Zarnews

Яқинда Андижон шаҳридаги мактабларда ишловчи «боши очиқ» аёлларнинг сирли рўйхати ҳақида ёзгандим. Тан олиш керак, бу рўйхат ижтимоий тармоқларда кенг муҳокамаларга сабаб бўлди. Хотин-қизлар қўмитаси билан Халқ таълими вазирлиги унчалик ишонарли чиқмаган бўлса-да, рўйхат «ички ишлар идораларига номзод кадрлар резерви учун» керак бўлганини айтди.

Сўнги кунларда Андижонда юз берган ҳодисалар эса (ўйлайманки, гап нимада эканлигини тушундингиз) рўйхат аслида нима учун керак бўлганлигига сигналдек туюлди менга. Қолаверса, айнан шу рўйхатнинг ортидан мен турли тазйиқ ва таҳдидларга учрамоқдаман.

13 август куни тунги соат 1:00 га яқин телефонимга +998 93 062 95 25 рақамидан номаълум шахс қўнғироқ қилиб, ўзини таништирмай, бирор бир сабабсиз мени турли ёмон ва куракда турмайдиган сўзлар билан ҳақоратлаб, ўлдириб юбориш билан таҳдид қилди. У Андижондаги мавжуд муаммоларни ОАВ ва ижтимоий тармоқлардаги саҳифаларим орқали ёритаётганимни «ватанга хиёнат»га тенглаштирди.

Чора кўришларини сўраб, Бош прокуратура ва ИИВга мурожаат қилгандим. Аризаларим айланиб-айланиб Наманган шаҳар ички ишлар идорасига бориб тушибди. Ўрганишяпти шекилли, ҳар ҳолда аҳён-аҳёнда қўнғироқ қилиб, уни-буни сўраб туришипти. Энг қизиғи, таҳдид қилган одамнинг рақами аниқ. Уни топиш қийин бўлмаса керак, деган яхши фикрдаман. Ахир биз тош асрида яшамаяпмиз-ку, тўғрими?!

Умид қиламанки, журналистик фаолиятимга тўсқинлик қилишга уринган ва ҳақоратлаган шахслар аниқланиб, қонун олдида жавоб беради.

Хуршид Далиев, журналист