Ўзбекистон мустақиллигининг 28 йиллиги муносабати билан Бухорода 15 нафар маҳкумга нисбатан жазони ўташ шартлари енгиллаштирилди, бир нафари озодликка чиқди ва оиласи бағрига қайтарилди. Бу ҳақда «Дарё»га Жиноят ишлари бўйича Когон шаҳар суди раиси Зариф Шеров маълум қилди.
Бухоро вилоят ИИБ Жазони ижро этиш бўлими 1-сонли жазони ижро этиш колониясида бўлиб ўтган сайёр суд мажлисида дастлаб, маҳкумларга нисбатан жазони ижро этиш муассасаси томонидан киритилган тақдимномалар кўриб чиқилган. Унга кўра, Жиноят-ижроия кодекси 113-моддасига асосан умумий тартибли колонияда жазони ўтаётган маҳкумлар манзил-колонияга ўтказилган.
Қайд этилишича, озодликдан маҳрум этиш тариқасида жазони ўтаётган маҳкумлар учун умумий тартибли колонияларга нисбатан манзил-колонияларда имтиёз ва енгилликлар мавжуд. Унда маҳкумлар соқчисиз, эркин ва фуқаролар кийимида юриши, чекланмаган миқдорда телефон орқали сўзлашиши, муассаса бошлиғи қарорига биноан манзил-колония ҳудудида ёки ундан ташқарида оиласи билан алоҳида яшашига рухсат берилиши ҳам мумкин.
Суд ажрими билан 16 нафар маҳкумнинг содир этган жинояти учун тайинланган жазо муддатининг асосий қисмини ўтагани, қилмишидан чин кўнглидан пушаймонлиги инобатга олинган.
Изоҳ (0)