Тошкент шаҳри туманлари кесимида энг кўп Мирзо Улуғбек туманида 23 та ҳолатда дарахтлар ноқонуний кесилганлиги аниқланди. Бу ҳақда Ўзбекистон Экология ва атроф-муҳитни муҳофаза қилиш давлат қўмитаси вакиллари журналистлар билан бўлиб ўтаётган мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Қўмита берган маълумотга кўра, Тошкент шаҳар Экология бошқармаси томонидан 2019 йилнинг ўтган даврида жами 212 та ҳолатда 192 та дарахт ноқонуний кесилган ва 152 та дарахт шикастлантирилган.
Аниқланган қонун бузилиши ҳолатлари бўйича 209 та маъмурий иш очилган бўлиб, 78,9 миллион сўм жарима ва 387,7 миллион сўм етказилган зарарни қоплаш учун ундириб олинган.
Қонунбузарликларнинг 9 та ҳолатида катта миқдорда зарар етказилганлиги учун (ЭКОИҲнинг 300 баробаридан ортиқ, 66,9 миллион сўм) ҳужжатлар прокуратура органларига киритилди ва жиноий ишлар қўзғатилган.
Пойтахт туманлари орасида энг кўп Мирзо Улуғбек туманида 23 та ҳолатда дарахтлар ноқонуний кесилганлиги ва бунинг натижасида 835,1 миллион сўм зарар етказилгани аниқланган. Шунингдек, Яшнобод туманида 17 та ҳолатда 602,7 миллон сўм, Чилонзор туманида 35 та ҳолатда 238,6 миллион сўмлик зарар етказилган.
Олдинроқ бир гуруҳ журналист ва блогерлар дарахтларнинг оммавий кесилиши бўйича мамлакат раҳбариятига очиқ хат йўллаган эди. Унда мамлакат раҳбарларидан шаҳар ва қишлоқларда дарахтларнинг назоратсиз кесилиши билан боғлиқ экологик масалани зудлик билан ва кечиктирмай ҳал этишлари талаб қилинган.
Изоҳ (0)