Наманган вилоятининг Учқўрғон туманида 29 август куни уч кишининг ўлими билан тугаган йўл-транспорт ҳодисаси юз берди. Бу ҳақда ИИВ Жамоатчилик ва ОАВ билан алоқалар бошқармаси хабар бермоқда.
Хабар беришларича, «Учқўрғон—Ҳаққулобод» йўлининг «Тегирмон» маҳалла фуқаролар йиғинидан ўтган қисмида соат тахминан 17:30 да 52 ёшли ҳайдовчи бошқарувидаги Damas ағдарилган.
Ағдарилган микроавтобус йўлнинг қарама-қарши қисмига чиқиб кетиб, шу йўналишда ҳаракатланиб келаётган, 24 ёшли ҳайдовчи бошқарувидаги Isuzu юк машинаси билан тўқнашув содир этган.
«Натижада Damas ҳайдовчиси воқеа жойида, унинг икки йўловчиси эса касалхонага олиб келинганида вафот этди», — дейилади ИИВ ахборотида. Жиноят иши қўзғатилган, тергов олиб борилмоқда.
Маълумот учун, 2018 йилда Ўзбекистон йўлларида юз берган йўл-транспорт ҳодисалари оқибатида 2262 киши ҳалок бўлган (2017 йилда қурбонлар сони 2473 нафар эди). Уларнинг 1031 нафари пиёдалардир.
Изоҳ (0)