Халқ таълими вазирлиги Тошкентдаги барча хусусий мактаб директорлари иштирокида янги ўқув йилида ўқувчи қизларнинг кийинишига оид мажлис ўтказганини рад этди. Бу ҳақда вазирлик матбуот хизмати маълум қилди.
Аввалроқ ижтимоий тармоқларда 26 август куни Тошкентдаги барча хусусий мактабларнинг раҳбарлари Халқ таълими вазирлигига чақиртирилганлиги, Президент Администрацияси ва Дин ишлари бўйича қўмита вакиллари иштирок этган вазирликдаги йиғилишда мактаб директорларидан ҳижобда ўқишга келадиган ўқувчи қизларнинг ота-онасига босим ўтказиш талаб қилингани ҳақида хабарлар тарқалган эди.
Халқ таълими вазирлигининг 29 августдаги баёнотида бундай йиғилиш ўтказилган инкор этилмоқда. «Ўзбекистон Республикаси Халқ таълими вазирлиги яқин вақт ичида бу ёки бошқа масала юзасидан хусусий мактаб раҳбарлари билан ҳеч қандай мажлис ўтказмаган», — дейилади вазирлик хабарида.
Маълумот учун, Вазирлар Маҳкамаси 2018 йил 15 августида ягона мактаб формаси бўйича қарор қабул қилган. Қарор билан тасдиқланган низомнинг 7-банди ижтимоий тармоқларда баҳс-мунозаралар, эътирозларга сабаб бўлган эди. Хусусан, ҳижобни ҳам тақиқлаган ушбу бандда, жумладан, шундай дейилган: «Ўқувчилар таълим муассасаси биноси ичида бош кийимсиз юришлари лозим, таълим муассасасида ўтказиладиган турли тадбирлар жараёни бундан мустасно».
Изоҳ (0)