Халқаро нашрлар томонидан Швециянинг Эстерсунд шаҳрида 15 август куни террористик фитнани ташкиллаштириш ва 2017 йил апрелида Стокгольмда юз берган терактга алоқадорликда гумонланиб, ўзбекистонлик деб тахмин қилинаётган шахс қўлга олингани ҳақида маълумот тарқатилган эди.
«29 август куни дипломатик ваколатхона Эстерсунд шаҳри округ судидан қўлга олинган шахснинг Ўзбекистон фуқароси эмаслиги тўғрисида расмий жавоб олди», — дея хабар бермоқда Ўзбекистон Ташқи ишлар вазирлиги. Гумонланувчи айнан қайси мамлакат фуқароси эканига ТИВ аниқлик киритмаган.
Эслатиб ўтамиз, 2017 йил 7 апрель куни асли ўзбекистонлик Раҳмат Оқилов олиб қочилган юк машинасини Стокгольм марказидаги Дроттнинггатан пиёдалар кўчаси бўйлаб ҳайдаб, кўплаб одамларни уриб-босиб кетган эди.
Теракт деб баҳоланган ҳодиса оқибатида беш киши ҳалок бўлган, ўн киши жароҳатланган эди. Оқилов биринчи суд сўроғидаёқ бу ишни ИШИД террорчилик ташкилотини қўллаб-қувватлаш мақсадида қилганини тан олган эди.
Раҳмат Оқилов мазкур қилмиши учун Швеция суди томонидан 2018 йил июнида умрбод озодликдан маҳрум этилган эди. У жазони Швециянинг энг қаттиқ тартибли қамоқхонасида ўтамоқда.
Изоҳ (0)