Тошкент вилоятининг Ангрен шаҳрини 2020—2022 йилларда комплекс ижтимоий-иқтисодий ривожлантириш чора-тадбирлар дастури тўғрисида ҳукумат қарори тайёрланди.
Ҳужжат билан Ангрен шаҳрида 2020—2022 йилларда бажарилиши белгилаб олинган асосий тадбирларни амалга ошириш ҳамда шаҳарни комплекс ижтимоий-иқтисодий ривожлантириш учун мавжуд имкониятларни тўлиқ сафарбар этиш мақсадида саноат ва хизмат кўрсатиш соҳасини комплекс ривожлантириш, саноат маҳсулотлари, жумладан, экспортбоп маҳсулот ишлаб чиқаришни ошириш, тадбиркорлик субъектларини қўллаб-қувватлаш, янги иш ўринлари, хусусан, аёллар учун иш ўринларини яратиш, бўш турган ва самарасиз фойдаланилаётган бино-иншоотлардан, ер майдонларидан самарали фойдаланиш ҳамда маҳаллий бюджет даромадларини ошириш тадбирлари тасдиқланади.
Дастур параметрлари бажарилишини таъминлаш бўйича давлат ва хўжалик бошқарув органлари, маҳаллий давлат ҳокимияти органлари, тижорат банклари фаолиятини мувофиқлаштириш ва мониторинг қилиш бўйича республика ишчи гуруҳи Дастурда назарда тутилган тадбирларнинг белгиланган муддатларга амалга оширилишини таҳлил қилиб боради ва мувофиқлаштиради.
Муаммоли масалалар мунтазам равишда ўрганиб борилиб, уларни ҳал этиш юзасидан тезкор чора-тадбирларни кўрилади.
Тошкент вилояти ҳокимлиги, Ангрен шаҳар ҳокимлиги тегишли давлат ва хўжалик бошқарув органлари, тижорат банклари ҳамда лойиҳа ташаббускорлари билан биргаликда бир ой муддатда Дастурдаги кўрсаткичлардан келиб чиққан ҳолда тармоқ жадваллари ишлаб чиқиб, тасдиқлатади.
Дастурга киритилган лойиҳалар ижросини таъминлашда лойиҳа ташаббускорларига ер танлаш ва ажратишни белгиланган тартибда, бош режага асосан амалга ошириш Ўзбекистон Ер ресурслари, геодезия, картография ва давлат кадастри давлат қўмитаси, Қурилиш вазирлиги, Тошкент вилояти ҳокимлиги ва Ангрен шаҳар ҳокимлиги зиммасига юкланади.
Шунингдек, «Ўзшаҳар қурилиш инвест» инжиниринг компанияси билан биргаликда 2020—2022 йилларда Ангрен шаҳрида 25 та арзон 5—7 қаватли кўп квартирали уйларни қурилишини таъминлаш чораларини кўрилади.
Ҳужжатга кўра, Тошкент вилояти ҳокимлиги Давлат активларини бошқариш агентлиги ва Қурилиш вазирлиги билан биргаликда ташаббускорларни жалб этган ҳолда «Кимёгар» маҳалласида қурилиши тугалланмаган техник жиҳатдан яроқсиз ҳолдаги 3 та кўп қаватли ётоқхона биносини белгиланган тартибда бузилиб, бўшаган ҳудудда 2020 йилда замонавий турар жой комплексларини қуриш тўғрисидаги таклифлари маъқулланди.
Изоҳ (0)