Тошкент – Самарқанд йўналишида ҳаракатланаётган автомобиль салонидаги йўловчи аёл безовталана бошлагач, ҳайдовчи «Манас-14» йўл-патруль хизмати масканида автомашинани тўхтатди.
М-39 «Олмаота – Тошкент – Термиз» автомобиль йўлининг Жиззах вилояти ҳудудидан ўтувчи 939-километрида жойлашган «Манас-14» йўл-патруль хизмати маскани инспекторлари аёлни зудлик билан постда ташкил этилган тиббий ёрдам кўрсатиш хонасига олиб кирди. Ҳомиладорликнинг сўнгги пайтида бўлган йўловчи Х.Қ. шу ерда кўзи ёриб, қиз фарзандли бўлди.
ЙПХ масканида узоқ масофага ҳаракатланувчи ҳайдовчиларга тиббий ёрдам кўрсатиш мақсадида ташкил этилган тиббий хизмат кўрсатиш хонаси янги меҳмоннинг дунёга келишига кўмаклашди. Шу куни она ва бола соғ-саломат манзилларига етиб олди.
Вилоят ИИБ йўл ҳаракати хавфсизлиги бошқармаси ходимлари қизалоқ ва онасининг кейинги саломатлигини билиш мақсадида Х.Қ хонадонига бориб келди. Она-бола соғлом. Оила инспекторларга миннатдорлик билдирди.
Изоҳ (0)