Ўзбекистонда шу йилнинг ноябридан бошлаб 9 ёшли қизлар одам папиллома вируси (ОПВ)га қарши эмланади. Бу бачадон бўйни саратонининг олдини олиш борасида синалган ва самарали усуллардан биридир.
Соғлиқни сақлаш вазирлиги матбуот хизматининг хабар беришича, бу ҳақда Тошкентда «Бачадон бўйни саратонисиз келажак» шиори остида бўлиб ўтган халқаро илмий-амалий анжуманда айтиб ўтилди. Тадбир ССВ ва Жаҳон соғлиқни сақлаш ташкилотининг Европа минтақавий бюроси томонидан ташкил этилган.
ЖССТ маълумотларига кўра, Ўзбекистонда ҳар йили 1660 нафар аёл бачадон бўйни саратони касаллигига чалинмоқда.
Бунинг олдини олиш бўйича Ўзбекистонда 2017 йилда Вазирлар Маҳкамаси томонидан миллий режа тасдиқланган. У ўз ичига бачадон бўйни саратонини даволаш, паллиатив ёрдам кўрсатиш билан бирга, ОПВга қарши эмлаш, бачадон бўйни саратонини скрининг қилиш каби бирламчи профилактик тадбирларни қамраб олади.
Миллий эмлаш календарига кўра, Ўзбекистонда болалар давлат бюджети ҳисобидан 12 та бошқариладиган инфекцияларга қарши эмланади. Эндиликда ОПВга қарши вакцинанинг жорий қилиниши эса яна бир оғир касаллик — бачадон бўйни саратони касаллигининг олдини олишга хизмат қилади.
Таъкидланишича, 9 ёшли ўсмир қизларни режали эмлаш шу йилнинг ноябрь ойидан бошланади. Бунинг натижасида келажакда ҳар йили 1 100 та касалланиш ва бачадон бўйни хасталиги бўйича 600 га яқин ўлим ҳолатларининг камайишига эришилади.
Изоҳ (0)