Агуэро Кейнга, Гвардиола эса яна Почеттинога қарши. Барчаси «Манчестер Сити»—«Тоттенҳэм» тўқнашуви ҳақида

Мухлислар интиқиб кутган Англия Премьер лигаси ҳам бошланди. 2019/20 йилги мавсумнинг илк турида футбол мухлисларини «Манчестер Юнайтед»—«Челси» тўқнашуви қанчалик хушнуд қилган бўлса, 2-турда ундан кам бўлмаган учрашув уларни кутиб турибди. 17 август, шанба оқшомидан ўрин олган турнинг марказий ўйинида Хосеп Гвардиола бошчилгидаги мусобақанинг амалдаги чемпиони «Манчестер Сити» ўтган йилги Европа Чемпионлар Лигаси финалчиси Маурисио Почеттино қўл остидаги «Тоттенҳэм»ни ўз майдонида меҳмон қилади. Биз эса учрашувга оид маълумотлар ва қизиқарли фактларни тақдим этишни ният қилдик.

«Манчестер Сити»

Премьер лиганинг амалдаги чемпиони янги мавсумни ҳам кўтаринки кайфиятда бошлади. Англия Суперкубогида «Ливерпуль»ни мағлуб этган Пеп Гвардиола шогирдлари мавсумни соврин билан бошлаб олди. Премьер лиганинг илк турида эса бир вақтлар «Манчестер Сити»га устозлик қилган чилилик Мануэл Пеллегрини қўл остидаги Лондоннинг «Вест Ҳэм» клуби 5:0 ҳисобида тор-мор этилд. Жамоа ўйини ўша-ўша — тажовузкор. Раҳим Стерлинг ва Серхио Агуэро ҳамон гол уришдан тўхтагани йўқ. Кевин де Брюйне ҳам жароҳатдан тикланиб олди. Камига «янги Бускетс» деб таърифланаётган Родри Эрнандес ҳам марказий ярим ҳимояни мустаҳкамлаш ҳаракатида. Фақатгина битта муаммо — Лерой Сане «Ливерпуль»га қарши ўйинда жароҳат олиб, узоқ муддатга сафдан чиқди. Аммо унинг ўрнини Бернарду Силва ҳамда Рияд Маҳрезлар билинтирмаслиги катта эҳтимол. Пепнинг ҳимоя чизиғидан кўнгли тўқ. Ляпорт сафга қайтди. Жон Стоунз ва Кайл Уокер ажойиб формада. Украиналик Олександр Зинченко ҳам ёмон кўринмаяпти. Камига «Ювентус»дан Жоау Канселу олиб келинди. Гвардиола ҳозирча катта маблағлар эвазига олиб келинган, аммо жароаҳтлардан боши чиқмаётган Бенжамен Мендининг хизматларидан фойдалана олмаяпти, холос. Умуман олганда, «Манчестер Сити»га Лондон клубига қарши ўйиннинг фаворити сифатида қаралмоқда.

«Тоттенҳэм»

Европа Чемпионлар Лигаси финалчиси «Тоттенҳэм» ҳам Премьер лигани ғалаба билан бошлади. Мавсум бошланишидан олдин «Тоттенҳэм» бу йил кучли тўртликка кириш учун эмас, балки чемпионлик учун курашишини таъкидлаган Маурисио Поччетино жамоаси «Астон Вилла»ни мағлуб этишда қийналгани рост. Аммо жамоа Кристиан Эриксендек етакчисини таркибда сақлаб қолиб, нияти жиддий эканлигини кўрсатди. «Шпорлар» мавсум аввалида Тангуй Ндомбеле, Джовани Ло Чельсо, Райан Сессеньон каби ўйинчиларни ўз сафига қўшиб олди. «Лион»дан харид қилинган Ндомбеле ҳатто ўзининг дебют ўйинида гол уришнинг ҳам уддасидан чиқди. Ўтган йилги асосий таркиб ўйинчиларидан фақатгина Киран Триппьер Мадриднинг «Атлетико»сига сотиб юборилди. Почеттинонинг ҳам ҳозирча таркибдан кўнгли тўқ деса бўлади. Бугунги ўйинни дисквалификация сабаб Сон Ҳён Мин ўтказиб юборади. Шунингдек, Деле Алли, Фойт ҳамда Райан Сессеньонлар жароҳат сабаб майдонга туша олмайди. Ўтган ўйинда дублга эришган Ҳарри Кейн эса бугунги ўйинга 100 фоиз тайёр. «Тоттенҳэм» сафарда ўйнашига қарамай «Манчестер Сити»га жиддий қаршилик кўрсатишини бемалол куца бўладиган ҳолат дея баҳолаш мумкин. Ҳар ҳолда бунга уларнинг иштиёқи ҳам кучи ҳам етарли, назаримизда.

Қизиқарли фактлар

1. «Манчестер Сити» АПЛ доирасида сўнгги 15 та ўйинда ғалаба қозонди.
2. «Шаҳарликлар» ўз майдонида «Тоттенҳэм»га қарши ўтган сўнгги 11 та ўйиннинг 9 тасида ғалаба қозонган.
3. «Манчестер Сити» АПЛ доирасида сўнгги 6 та ўйиндан 5 тасида гол ўтказмади.
4. «Шпорлар» АПЛнинг 2019/20 йилги мавсуми илк туридан барча жамоадан кўпроқ дарвоза томон зарба берди — 31 та. Шулардан 18 тасида Кристиан Эриксен майдонда бўлган 26 дақиқага тўғри келди.
5. «Тоттенҳэм» меҳмонда ўтган сўнгги 4 та ўйинда 1 та гол фарқи билан мағлуб бўлмоқда.
6. «Манчестер Сити» АПЛ доирасида «Тоттенҳэм»га қарши ўтган сўнгги 4 та ўйинда ғалаба қозонди. Аммо «Сити» шу кунга қадар «шпорлар» устидан кетма-кет 5 та ўйинда ғалаба қозона олмаган.
7. Раҳим Стерлинг Лондон клубига қарши сўнгги 6 та ўйинда 5 та гол уриб, 1 та голга ассистентлик қилган.

Мураббийлар нима дейди?

«Англияга келган вақтимдан бери «шпорлар» доимо чемпионлик учун курашиб келади. Ўшанда улар мусобақани иккинчи ўринда якунлаган эди. Улар ҳар доим юқори ўринлар учун курашган. Улар айни дамда Европанинг энг кучли иккинчи рақамли жамоаси»,— дейди «Манчестер Сити» устози Пеп Гвардиола.

«Гвардиола жамоасига қарши омадли ўйинлар серияси? Бу мен учун Гвардиола билан ким ўзарга ўйнаш мусобақаси эмас. Балки, бу шунчаки тасодифдир. Мен ўзим қарши ўйнайдиган жамоа мураббийларини мағлуб этишни хуш кўраман, холос. Каминага рақобатбардош бўлиш ёқади»,— дейди «Тоттенҳэм» бош мураббийи Маурисио Почеттино.

Тахминий таркиблар