Aguero Keynga, Gvardiola esa yana Pochettinoga qarshi. Barchasi “Manchester Siti”—“Tottenhem” to‘qnashuvi haqida

Muxlislar intiqib kutgan Angliya Premyer ligasi ham boshlandi. 2019/20-yilgi mavsumning ilk turida futbol muxlislarini “Manchester Yunayted”—“Chelsi” to‘qnashuvi qanchalik xushnud qilgan bo‘lsa, 2-turda undan kam bo‘lmagan uchrashuv ularni kutib turibdi. 17-avgust, shanba oqshomidan o‘rin olgan turning markaziy o‘yinida Xosep Gvardiola boshchilgidagi musobaqaning amaldagi chempioni “Manchester Siti” o‘tgan yilgi Yevropa Chempionlar Ligasi finalchisi Maurisio Pochettino qo‘l ostidagi “Tottenhem”ni o‘z maydonida mehmon qiladi. Biz esa uchrashuvga oid ma’lumotlar va qiziqarli faktlarni taqdim etishni niyat qildik.

“Manchester Siti”

Premyer liganing amaldagi chempioni yangi mavsumni ham ko‘tarinki kayfiyatda boshladi. Angliya Superkubogida “Liverpul”ni mag‘lub etgan Pep Gvardiola shogirdlari mavsumni sovrin bilan boshlab oldi. Premyer liganing ilk turida esa bir vaqtlar “Manchester Siti”ga ustozlik qilgan chililik Manuel Pellegrini qo‘l ostidagi Londonning “Vest Hem” klubi 5:0 hisobida tor-mor etild. Jamoa o‘yini o‘sha-o‘sha — tajovuzkor. Rahim Sterling va Serxio Aguero hamon gol urishdan to‘xtagani yo‘q. Kevin de Bryuyne ham jarohatdan tiklanib oldi. Kamiga “yangi Buskets” deb ta’riflanayotgan Rodri Ernandes ham markaziy yarim himoyani mustahkamlash harakatida. Faqatgina bitta muammo — Leroy Sane “Liverpul”ga qarshi o‘yinda jarohat olib, uzoq muddatga safdan chiqdi. Ammo uning o‘rnini Bernardu Silva hamda Riyad Mahrezlar bilintirmasligi katta ehtimol. Pepning himoya chizig‘idan ko‘ngli to‘q. Lyaport safga qaytdi. Jon Stounz va Kayl Uoker ajoyib formada. Ukrainalik Oleksandr Zinchenko ham yomon ko‘rinmayapti. Kamiga “Yuventus”dan Joau Kanselu olib kelindi. Gvardiola hozircha katta mablag‘lar evaziga olib kelingan, ammo jaroahtlardan boshi chiqmayotgan Benjamen Mendining xizmatlaridan foydalana olmayapti, xolos. Umuman olganda, “Manchester Siti”ga London klubiga qarshi o‘yinning favoriti sifatida qaralmoqda.

“Tottenhem”

Yevropa Chempionlar Ligasi finalchisi “Tottenhem” ham Premyer ligani g‘alaba bilan boshladi. Mavsum boshlanishidan oldin “Tottenhem” bu yil kuchli to‘rtlikka kirish uchun emas, balki chempionlik uchun kurashishini ta’kidlagan Maurisio Pochchetino jamoasi “Aston Villa”ni mag‘lub etishda qiynalgani rost. Ammo jamoa Kristian Eriksendek yetakchisini tarkibda saqlab qolib, niyati jiddiy ekanligini ko‘rsatdi. “Shporlar” mavsum avvalida Tanguy Ndombele, Jovani Lo Chelso, Rayan Sessenyon kabi o‘yinchilarni o‘z safiga qo‘shib oldi. “Lion”dan xarid qilingan Ndombele hatto o‘zining debyut o‘yinida gol urishning ham uddasidan chiqdi. O‘tgan yilgi asosiy tarkib o‘yinchilaridan faqatgina Kiran Trippyer Madridning “Atletiko”siga sotib yuborildi. Pochettinoning ham hozircha tarkibdan ko‘ngli to‘q desa bo‘ladi. Bugungi o‘yinni diskvalifikatsiya sabab Son Hyon Min o‘tkazib yuboradi. Shuningdek, Dele Alli, Foyt hamda Rayan Sessenyonlar jarohat sabab maydonga tusha olmaydi. O‘tgan o‘yinda dublga erishgan Harri Keyn esa bugungi o‘yinga 100 foiz tayyor. “Tottenhem” safarda o‘ynashiga qaramay “Manchester Siti”ga jiddiy qarshilik ko‘rsatishini bemalol kutsa bo‘ladigan holat deya baholash mumkin. Har holda bunga ularning ishtiyoqi ham kuchi ham yetarli, nazarimizda.

Qiziqarli faktlar

1. “Manchester Siti” APL doirasida so‘nggi 15 ta o‘yinda g‘alaba qozondi.
2. “Shaharliklar” o‘z maydonida “Tottenhem”ga qarshi o‘tgan so‘nggi 11 ta o‘yinning 9 tasida g‘alaba qozongan.
3. “Manchester Siti” APL doirasida so‘nggi 6 ta o‘yindan 5 tasida gol o‘tkazmadi.
4. “Shporlar” APLning 2019/20-yilgi mavsumi ilk turidan barcha jamoadan ko‘proq darvoza tomon zarba berdi — 31 ta. Shulardan 18 tasida Kristian Eriksen maydonda bo‘lgan 26 daqiqaga to‘g‘ri keldi.
5. “Tottenhem” mehmonda o‘tgan so‘nggi 4 ta o‘yinda 1 ta gol farqi bilan mag‘lub bo‘lmoqda.
6. “Manchester Siti” APL doirasida “Tottenhem”ga qarshi o‘tgan so‘nggi 4 ta o‘yinda g‘alaba qozondi. Ammo “Siti” shu kunga qadar “shporlar” ustidan ketma-ket 5 ta o‘yinda g‘alaba qozona olmagan.
7. Rahim Sterling London klubiga qarshi so‘nggi 6 ta o‘yinda 5 ta gol urib, 1 ta golga assistentlik qilgan.

Murabbiylar nima deydi?

“Angliyaga kelgan vaqtimdan beri “shporlar” doimo chempionlik uchun kurashib keladi. O‘shanda ular musobaqani ikkinchi o‘rinda yakunlagan edi. Ular har doim yuqori o‘rinlar uchun kurashgan. Ular ayni damda Yevropaning eng kuchli ikkinchi raqamli jamoasi”,— deydi “Manchester Siti” ustozi Pep Gvardiola.

“Gvardiola jamoasiga qarshi omadli o‘yinlar seriyasi? Bu men uchun Gvardiola bilan kim o‘zarga o‘ynash musobaqasi emas. Balki, bu shunchaki tasodifdir. Men o‘zim qarshi o‘ynaydigan jamoa murabbiylarini mag‘lub etishni xush ko‘raman, xolos. Kaminaga raqobatbardosh bo‘lish yoqadi”,— deydi “Tottenhem” bosh murabbiyi Maurisio Pochettino.

Taxminiy tarkiblar