Португалияда дунёдаги энг йирик қурол савдогари қўлга олинди

Ноқонуний қурол савдоси бўйича халқаро қидирувда бўлган белгиялик Жак Месье Португалияда қўлга олинди. У сўнгги 35 йилдаги барча йирик можаро иштирокчиларига қурол етказиб берганликда айбланмоқда, деб хабар беради Tengrinews.

«Маршал» ёки «Тулки» лақаби билан танилган Месье аввалроқ Ливия, Чад, Покистон ва Эронга ўқотар қуроллар, зирҳли техникалар, вертолётлар ва бошқа қурол-яроқларни ноқонуний етказиб бергани учун тўрт йил қамоқ жазосига ҳукм этилган эди. Ҳукм эълон қилингач, у яширинишга муваффақ бўлган.

Месьени қўлга олиш операцияси Эвора шаҳрида Португалия полицияси томонидан амалга оширилди. Бунда Франция, Бельгия ва Португалия ҳуқуқ-тартибот органларининг ходимлари ҳамкорликда ишлаган.

Бельгиялик қурол савдогари Франциядаги вилласидан отларини Португалияга олиб келиниши учун кетган йўл харажатлари тўланмагани сабаб қўлга тушган. Айнан шу маълумот орқали терговчилар Месьенинг изига тушган.

Маълумотларга кўра, Месье 1980 йиллардаёқ Эронга Ироқ билан уруши вақтида қурол етказиб беришда гумонланган.

66 ёшли белгиялик 16 август куни Португалия суди олдида жавоб беради. Бельгия ҳукумати Месьенинг экстадицияси бўйича сўров юборишни режалаштирмоқда.