2018 йилнинг сентябрь ойида Facebook, октябрь ойида эса Youtube узилишлар билан ишлай бошлади. Шу сабабли мамлакатда мобил VPN оммавийлашиб кетди, деб ёзади Spot.
Алтер Эго дастурида Ахборот ва оммавий коммуникациялар агентлиги директори Комил Алламжонов Facebook ва Youtube муаммосига тўхталиб ўтди.
«Facebook ва Youtube’ни ёпиш билан салбий ахборотлар оқимини камайтириш мумкин, деб шу қарорга келишган. Бу масала жуда жиддий мунозараларга сабаб бўлган. Мен салбий ахборотларга қарши контраргумент ва контрфактлар билан курашиш керак, деган фикрни айтганман», — дейди агентлик директори.
Комил Алламжоновнинг сўзларига кўра, мазкур тизимларни блоклаганлар ҳозирда ҳибсда.
Шунингдек, у Facebook ва Youtube’даги узилишлар сабабли барча VPN’дан фойдаланишни бошлаганини қайд этди.
«VPN барча хавфсизлик тизимларини бузади. У барча ресурсларга кириш имконини беради. Агар ҳамма VPN’дан фойдаланишни бошласа, давлатда назорат қилиш воситаси қолмайди, масалан, террористик сайтларни, конституцияга қарши турли тарғибот ҳаракатларини ёки гиёҳванд моддалар савдоси билан шуғулланувчи сайтларни назоратга олиб бўлмайди. Агар ҳар бир фуқаро ҳар қандай тўсиқдан ўтиб кетадиган VPN’дан фойдаланаётган бўлса, қандай қилиб мамлакатни ҳимоя қилиш мумкин?» — дейди Алламжонов.
Изоҳ (0)