Сингапурнинг Сентоза оролида ўзбек маданияти кечаси бўлиб ўтди

Ўзбекистоннинг Сингапурдаги элчихонаси ва «Visit Uzbekistan» ҳамкорлигида 5 август куни Сингапурнинг таниқли Сентоза оролида ўзбек маданияти кечаси ўтказилди. Бу ҳақда элчихона матбуот хизмати маълум қилди.

Кечада 200 га яқин ишбилармон элита, инвесторлар, дипломатик корпус ва ижодий доиралар вакиллари иштирок этган.

Ўзбекистонни анъаналарда намойиш этиш учун Осиё мегаполисига ўзбек маданият бизнесининг вакиллари, жумладан «Бегим» ўзбек парфюмерия тармоғининг асосчиси Гулчеҳрабегим Махмудова, «Анор» мода брендининг муаллифи Дилноза Умирзоқова, «Visit Uzbekistan» халқаро ҳамкорлик платформаси ва шу номдаги журнал ташаббускори Динара Дултаева, сураткаш Муҳиддин А Лее ҳамда ошпаз Хасан Расулов ташриф буюрган.

Кечани Ўзбекистоннинг Сингапурдаги элчиси Қаҳрамон Шокиров очиб берган. Элчи ўз нутқида сўнгги икки йил ичида Сингапурдан Ўзбекистонга ташриф буюрган сайёҳлар сони 60 фоизга ўсганини таъкидлаб ўтган.

Тадбир меҳмонлари Муҳиддин А Лее томонидан «Visit Uzbekistan» деб номланган фотокўргазма билан кутиб олинди. Унда фотосуратчининг диққатга сазовор жойларда миллат руҳи, меъморий мажмуаларнинг бетакрор шакллари ва миллий урф-одатларни бойлигини акс эттирувчи 28 та фотосуратдан иборат тўплами намойиш этилган.

Шунингдек, меҳмонлар саккиз тонналик паловни Гиннеснинг рекордлар китобига киритиш бўйича ошпазлар жамоаси аъзоси, еттинчи авлод вакили бўлмиш пазандалик устаси Ҳасан Расулов меҳмонларни ош, сомса ва миллий ширинликлар билан таништирган.

«Feel Uzbekistan» дизайнерлик шоуси кечанинг ёрқин бўлимига айланган. Тўплам «Анор» мода уйининг эксклюзив композициясини намойиш этувчи haute couture услубидаги 10 та кўринишдан иборат бўлди. Ушбу тўплам илгари Милан мода ҳафталигида иштирок этган. Шунингдек, «Мурсак» брендининг миллий либослари тўплами ҳам намойиш этиган.

Кеча давомида Францияда яратилган, Ўзбекистон тарихи ва маданиятига бағишланган «Бегим» парфюмерия тўпламининг тақдимоти ҳам бўлиб ўтган. «Begim Parfumes Treasure Collection» парфюмерия тўплами жаҳон маданияти тарихидан илҳомланган ҳолда яратилган бўлиб, аёллар ва эркаклар учун бир қатор бетакрор парфюмларни ўз ичига олади. Тўплам «Bukhara Spirit», «Samarkand Spirit», «Rubi of Timur», «Kohinoor Dimonds» ва «Silk Road» номли парфюмларни ўз ичига олади. Ушбу тўплам Париж, Лондон, Дубай, Доҳа, Ар-Риёд ва бошқа пойтахтлардаги парфюмерия дўконларида катта муваффақиятли сотувларга сазовор бўлган.

Кеча Ўзбекистонга саёҳатчилар ва ишбилармонлар учун инглиз тилидаги биринчи журнал — «Visit Uzbekistan» тақдимоти билан якунланган. Журналда сайёҳлик ва сармоявий салоҳият, мамлакатнинг ижтимоий ва маданий ҳаётидаги тадбирлари, санъат, гастрономия, анъаналар, мерос ва одамлар ҳақида сифатли маълумотлар келтирилган. Туристик маршрутлар, хариталар, бўлажак тадбирларнинг афишалари, харидлар ҳақида жуда кўп фойдали маълумотлар ҳам нашрда тақдим этилган. Журнал 3000 нусхада чоп этилиб, дунё бўйлаб элчихоналар, сайёҳлик агентликлари ва ҳамкорлар орқали тарқатилади. Икки йил ичида журналнинг 20 сони чоп этилиб, 15 дан ортиқ мамлакатларда намойиш этилган. Ушбу лойиҳа асосида дунёнинг 11 мамлакатдаги экспертлар кенгаши ва Ўзбекистондаги сайёҳлик ва ижодкорлик соҳасидаги ишбилармон доираларни бирлаштирган «Visit Uzbekistan» халқаро ҳамкорлик платформаси ташкил этилган.