5 августнинг эътиборга молик янгиликлари — «Дарё» дайжестида.
Шавкат Мирзиёев 17 йиллик фаолияти давомида биринчи марта меҳнат таътилига чиқди.
Давлат раҳбарининг таътили Ўзбекистон ҳудудида ўтказилиши режалаштирилган.
Президентнинг таътилга чиқиши Ўзбекистон тарихида биринчи марта эмас, лекин аввал таътилга чиқиш расман эълон қилинганини эслаш қийин.
***
Шаҳноза Мирзиёева Мактабгача таълим вазирлиги Мактабгача таълим соҳаси сиёсатини шакллантириш ва юритиш бош бошқармаси бошлиғи этиб тайинланди.
У 2017 йилнинг декабридан бошлаб Мактабгача таълим вазирлигининг Мактабгача таълим муассасалари фаолиятини ташкил этиш бошқармаси бошлиғи ўринбосари сифатида ишлаб келаётган эди.
***
Tengrinews президентлар қанақа поябзал кийиши тасвирланган суратлар тўпламини тақдим этди.
Россия президентининг бўйи пастлиги сабаб пошнаси юқори оёқ кийим кийиб юради. Журналистлар бу каби «баланд» поябзалларни Россия бош вазири Дмитрий Медведевда ҳам бир неча бор кузатган.
Ўзбекистон Президенти Шавкат Мирзиёевнинг Z Zegna брендига оид кроссовкаси эса 317 доллар туради. Ҳайит арафасида эълон қилинган суратдан кейин унинг нархи 500 долларга чиқиб кетган.
***
Бухоро вилоят ИИБ матбуот хизмати хабарига кўра, 4 август куни соат 18:30 ларда «Бухоро—Хоразм» (Олмаота—Нукус) йўналишида ҳаракатланиб бораётган йўловчи автобус мудҳиш ҳалокатга учради.
Оқибатда автобусда 1 нафар йўловчи воқеа жойида вафот этган, 2 нафар шахс оғир ва 8 нафар шахс турли даражадаги тан жароҳатлари олган. Автобусда бўлган барча йўловчиларга биринчи тиббий ва психологик ёрдам кўрсатилган.
***
Туркманистон президенти Гурбангули Бердимуҳамедов таътилни мароқли ва фаол тарзда ўтказмоқда.
Мамлакат раҳбарининг дам олаётгани тасвирланган сюжет билан туркман телевидениеси бўлишди.
Сюжетда мамлакат раҳбари эрта тонгда туриб, велосипедда сайр қилаётгани, отхонасида ахалтака зотидаги отларни минаётгани ҳамда Ашхободдаги Олимпиада шаҳарчасида кучишлатар тузилмаларининг раҳбарлари билан жисмоний машғулот билан шуғуллангани тасвирланган.
Изоҳ (0)