Тошкент марказидан оқиб ўтувчи Катта Бўрижар каналининг Новза (собиқ Комил Ёрматов) кўчаси ҳудудидан ўтувчи қисмида, «Ўзбекфильм» ошхонаси ёнидаги пиёдалар кўприги остида ов қилаётган маҳаллий балиқчининг қармоғига инсон жасади илинган, деб ёзади «Kun.uz».
Маълум бўлишича, Б. исмли балиқчи бугун, 5 август куни соат тахминан 10:00 ларда кўприк тагида балиқ овлаётган бўлган. Қармоққа нимадир илинганини ҳис қилган балиқчи уни тортганида сув юзасига инсон танаси орқа томони билан қалқиб чиқади. Чўчиб кетган балиқчи бехосдан қармоқни кескин тортиб юборади ва ип узилиб кетади. Шундан сўнг балиқчи 102 рақамига қўнғироқ қилади ва воқеа жойига ички ишлар, ФВВ, маҳалла нозирларидан иборат гуруҳ етиб келади.
Бу орада жасад Бунёдкор шоҳ кўчаси томон тахминан 300 метр сузиб боради ва сувдаги дарахт шохига илиниб қолади. ФВВнинг икки ходими жасадни шохдан ажратиб, қирғоққа олиб чиқди. Кўринишидан бу ёш эркак киши бўлиб, дастлабки маълумотларга қараганда тахминан 2 кун илгари сувга чўкиб кетган. Катта Бўрижар канали йўлга нисбатан тахминан 6-7 метр чуқурликда жойлашгани жасадни олиб чиқишда қийинчилик туғдиргани учун қўшимча кучлар чақирилган ва жасад чиқариб олинган.
Жасад кийимда бўлгани, ҳужжатлари ҳам чўнтагида эканига қараганда у чўмилиш мақсадида сувга тушмаган. Тахминларга кўра, у бахтсиз ҳодиса туфайли сувга тушиб кетган ёки атайлаб тушириб юборилган, бу борада аниқ маълумотлар тергов жараёнида маълум бўлади. Ёнидан топилган паспортга кўра, фуқаро бедарак йўқолганлар рўйхатида бўлган.
Ҳодиса юзасидан ИИББнинг расмий хабари ҳозирча эълон қилингани йўқ.
Изоҳ (0)