Ўзбекистон бош вазири ўринбосари — Молия вазири Жамшид Қўчқоров: «Тошкентдан янги уйни уч йил ичида сотишда пойтахтда пропискаси борлар ва йўқларга икки хил кўринишда тўлов белгиланганлиги масаласида «тош-тарозини тўғрилаш»ни ўйлаб кўриш керак». Қўчқоров бу ҳақда журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Жамшид Қўчқоров бозор иқтисодиётида «тарози» бузилмаслиги учун нархлар бозор талабига мослашаётганини билдирди. Бунга мисол тариқасида 2017 йилда долларни эркин конвертация қилингани ва бензин нархлари пойтахтда ҳам, вилоятларда ҳам тенглаштирилганини айтиб ўтди.
«Бозор иқтисодиётида одамлар ёки иқтисодий субъектлар бир-бирига товар ва хизматларни эркин, ўзи хоҳлаган нархда сотади ва бунда ўлчов бирлиги ҳам объектив бўлади. Ўлчов бирлиги нима? Ўлчов бирлиги — пул. Бозор иқтисодиётида, тушунишим бўйича, ‘тарози’ бузилмаслиги керак», — деди молия вазири.
Шу ўринда қайд этиш ўринлики, Тошкент шаҳри ва Тошкент вилоятида доимий рўйхатда турмайдиган Ўзбекистон фуқаролари иккиламчи бозордан (эски) уй сотиб ололмайди. Бирламчи бозордан янги уй сотиб олган тақдирда эса, уйни 3 йил ичида сотадиган бўлса, энг кам ойлик иш ҳақининг 400 баравари (5 август ҳолатига кўра — 81 миллион 92 минг сўм) миқдорида давлат божи тўлаши керак. Тошкентда доимий пропискаси бор фуқаролар эса худди шундай (янги) уйни уч йил ичида сотадиган бўлса, бож миқдори энг кам ойлик иш ҳақининг 10 бараваридан (2 027 300 сўм) ошмайди.
«Дарё» мухбири анжуман мавзусига тааллуқли бўлмаса-да, айнан шу масалада вазир айтаётган «тарози» қанчалик бузилгани ҳақидаги савол билан Жамшид Қўчқоровга мурожаат қилди.
Вазир шундай жавоб берди: «Пропискани эркинлаштириш босқичма-босқич амалга оширилмоқда, олдинга силжиш бўляпти. Энг кам иш ҳақининг 400 баравари миқдоридаги тўлов масаласини ўйлаб кўрамиз. Сиз жуда тўғри айтяпсиз, бунинг ‘тош-тарози’сини тўғрилашга ҳаракат қиламиз, чорасини кўрамиз. Бу масалага яна қайтамиз».
Изоҳ (0)