Россия Либерал-демократик партияси етакчиси Владимир Жириновский Сибирдаги ўрмонларнинг ёнишига нима сабаб бўлаётгани борасидаги фикрлари билан бўлишди, деб хабар беради «РИА Новости».
Унинг фикрича, кенг кўламли ёнғинлар ўрмон қўриқчиларининг штати кескин қисқариб кетгани оқибатида юзага келмоқда.
«Ўрмон қўриқчиларининг сони беш баробарга қисқариб кетди! Авваллари биз ёнғин ўчоғини тезда аниқлаган ва озгина куч билан уни ўчирган бўлсак, эндиликда уни аниқлайдиган, кузатадиган одам йўқ. Олов миллионлаб гектар ҳудудни эгаллашини кутиб ўтирамиз! Шунда ҳам ўчиришни хоҳлашмайди. Қиммат. Тўғри, бу қимматга тушади. Бироқ одамлар ҳақида ким ўйлайди», — деб ёзади Жириновский ўзининг Telegram’даги каналига.
Россиянинг Сибир ўлкасида кучли ўрмон ёнғинлари содир бўлмоқда. Ушбу муносабат билан Иркутск, Красноярск, Бурятия ва Якутиянинг алоҳида ҳудудларида фавқулодда ҳолат эълон қилинган. Бугунги кун ҳолатида ўрмон ёнғинларининг умумий майдони 2,7 миллион гектарни ташкил қилади. Бу ўтган йилга нисбатан 12 фоизга кўп.
Мутахассислар Сибир ва Тайга ўрмонларида 500 дан ортиқ ёнғин ўчоқларини аниқлаган. Асосий ўрмон ёнғин пайдо бўлган ҳудудлар аҳоли яшайдиган пунктлардан йироқ, техника етиб бориши қийин бўлган ҳудудларда жойлашгани туфайли уларни ўчиришнинг иложи йўқ.
Изоҳ (0)