Rossiya Liberal-demokratik partiyasi yetakchisi Vladimir Jirinovskiy Sibirdagi o‘rmonlarning yonishiga nima sabab bo‘layotgani borasidagi fikrlari bilan bo‘lishdi, deb xabar beradi “RIA Novosti”.
Uning fikricha, keng ko‘lamli yong‘inlar o‘rmon qo‘riqchilarining shtati keskin qisqarib ketgani oqibatida yuzaga kelmoqda.
“O‘rmon qo‘riqchilarining soni besh barobarga qisqarib ketdi! Avvallari biz yong‘in o‘chog‘ini tezda aniqlagan va ozgina kuch bilan uni o‘chirgan bo‘lsak, endilikda uni aniqlaydigan, kuzatadigan odam yo‘q. Olov millionlab gektar hududni egallashini kutib o‘tiramiz! Shunda ham o‘chirishni xohlashmaydi. Qimmat. To‘g‘ri, bu qimmatga tushadi. Biroq odamlar haqida kim o‘ylaydi”, — deb yozadi Jirinovskiy o‘zining Telegram’dagi kanaliga.
Rossiyaning Sibir o‘lkasida kuchli o‘rmon yong‘inlari sodir bo‘lmoqda. Ushbu munosabat bilan Irkutsk, Krasnoyarsk, Buryatiya va Yakutiyaning alohida hududlarida favqulodda holat e’lon qilingan. Bugungi kun holatida o‘rmon yong‘inlarining umumiy maydoni 2,7 million gektarni tashkil qiladi. Bu o‘tgan yilga nisbatan 12 foizga ko‘p.
Mutaxassislar Sibir va Tayga o‘rmonlarida 500 dan ortiq yong‘in o‘choqlarini aniqlagan. Asosiy o‘rmon yong‘in paydo bo‘lgan hududlar aholi yashaydigan punktlardan yiroq, texnika yetib borishi qiyin bo‘lgan hududlarda joylashgani tufayli ularni o‘chirishning iloji yo‘q.
Izoh (0)