Самарқандда 10 кунлик келинчакни аёвсиз калтаклаган эрга нисбатан 24 июль куни суд ҳукми ўқилди. Sputnik’нинг хабар беришича, эркакка уч йил-у саккиз ой озодликдан маҳрум қилиш жазоси берилди.
Хабарда айтилишича, ҳукм ўқиладиган куни эркакнинг бирорта қариндоши суд мажлисида қатнашмаган. Судья ўз ҳукмини эълон қилганидан сўнг, эркакнинг адвокати келин томондан мижози учун раҳм-шафқат сўраган, аммо келин уни кечирмаган.
Эслатиб ўтамиз, Самарқанд вилояти Булунғур туманида тўйдан 10 кун ўтгач ёш келинчак эри томонидан аёвсиз калтакланган ва туман касалхонасининг реанимация бўлимига тушган эди.
1988 йилда туғилган Зухра Умарованинг юзида соғ жой қолмаган, кўзлари даҳшатли шишиб, қонталаш бўлиб кетган эди. Уни бу ҳолатда ҳатто туққан онаси ҳам танимаган.
Умарованинг онаси ўша вақтда ҳуқуқни муҳофаза қилиш органларига қилган мурожаати бесамар кетган, онага қизини даволатиш ва «ўзига қимматга тушиши боис тиббий экспертизани ўтказмаслик» маслаҳат берилган.
Изоҳ (0)